Memlekettik bilim berý granttaryn bólýde basymdyq tehnıkalyq, pedagogıkalyq jáne aýyl sharýashylyǵy mamandyqtaryna berildi
ASTANA. 6 tamyz. QazAqparat - Búgin QR Bilim jáne ǵylym mınıstri Baqytjan Jumaǵulovtyń tóraǵalyǵymen bilim berý granttaryn taǵaıyndaý jónindegi respýblıkalyq komıssııa jumysyn bastady.
Komıssııa quramyna QR Bilim jáne ǵylym mınıstrliginiń, QR Densaýlyq saqtaý mınıstrliginiń ókilderi, joǵary oqý oryndarynyń rektorlary, bilim qyzmetkerleri kásipodaǵynyń tóraıymy engizildi.
Eske sala ketsek, konkýrstyq komıssııa otyrysynda Qazaqstannyń joǵary oqý oryndaryna qabyldaý boıynsha úlken daıyndyq jumystarynyń qorytyndylary shyǵarylatyn bolady.
Jıyndy ashyp sóz sóılegen mınıstr, vedomstvo jyl ishinde stýdent kontıngentin irikteý men qalyptastyrýdyń sapasyn joǵarylatý jóninde birqatar júıeli sharalar qabyldaǵanyn jetkizdi. Sondaı-aq, B. Jumaǵulov aǵymdaǵy jyly memlekettik tapsyrystyń qurylymy qaıta qarastyrylǵanyn, memlekettik tapsyrys ekonomıka suranysy boıynsha jaqyndatylǵanyn aıtty.
«Eldiń áleýmettik-ekonomıkalyq damýynyń strategııalyq basymdyqtaryna nazar aýdaryldy. Bul, eń aldymen Elbasy jarııalaǵan údemeli ındýstrııalandyrý baǵyty. Bilim berý salasyn jańǵyrtý maqsatynda memlekettik tapsyrysta pedagogıkalyq kadrlardy daıarlaýǵa erekshe oryn bólindi. Sondaı-aq, agroónerkásip kesheniniń damýy da nazarǵa alyndy», - dedi mınıstr.
Aıtylǵan basymdyqtar eskerile otyryp, tehnıkalyq ǵylymdar men tehnologııalarǵa 12 myńǵa jýyq, pedagogıkalyq mamandyqtarǵa 6600-den astam oryn, aýyl sharýashylyǵy men veterınarlyq ǵylymdarǵa 2630 oryn bólindi.
