Memlekettik baspanaǵa úmitker bolýǵa quqyǵy bar adamdar toby zańnama deńgeıinde anyqtalady

Bul týraly búgin Májilistiń jalpy otyrysynda Óńirlik damý mınıstri Bolat Jámishev málim etti. Eske salaıyq, jalpy otyrysta palata depýtattary «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldaǵan bolatyn.

«Qujattyń maqsaty turǵyn úı qatynastary salasynda ákimshilik quqyq buzýshylyqtardyń jańa quramdaryn engizý, memlekettik baspana alýǵa úmitker adamdardyń tobyn anyqtaý úshin bıýdjettik uıym uǵymyn engizý bolyp tabylady. Budan bólek ýákiletti organdardyń turǵyn úıge qoıylatyn tehnıkalyq talaptary boıynsha quzyretin anyqtaý qarastyrylyp, kondomınıým nysanyn basqarý organdary qyzmetiniń ashyqtyǵyn qamtamasyz etý kózdeledi», dedi Óńirlik damý mınıstri Bolat Jámishev.

Onyń aıtýynsha, kondomınıým nysandaryn basqarý organdaryna qatysty turǵyn úı-kommýnaldyq sharýashylyq salasy boıynsha quqyq buzýshylyqtardyń jańa quramy engiziledi.

Sonymen qatar, turǵyn úı qatynastary týraly zańnamaǵa «bıýdjettik uıymdardyń qyzmetkerleri» týraly jańa uǵym engiziledi. «Qazirgi ýaqytta bıýdjettik uıymdardyń qyzmetkerlerine jatqyzylǵan adamdar toby elimizdiń eshqandaı zań aktisinde anyqtalmaǵan. Osyǵan oraı, baspanaǵa kezekte turǵandardyń tizimin jyl saıyn túgendeý kezinde jergilikti atqarýshy organdar olardan rastaıtyn qujattardy talap etedi. Bul óz kezeginde azamattardyń atalǵan sanattary úshin bolmaı otyr. Sondyqtan da bıýdjettik uıymdardyń qyzmetkerleri uǵymy memlekettik turǵyn úılerdi berýge úmitker bolýǵa quqyǵy bar adamdar tobyn anyqtaý maqsatynda engiziletin bolady», deıdi mınıstr Bolat Jámishev.

Budan bólek, zań jobasynda kóp balaly otbasylardyń memlekettik turǵyn úı qorynan baspana alǵanǵa deıin olardyń kezegin saqtaý, Uly Otan soǵysynyń qatysýshylary men múgedekterine jáne solarǵa teńestirilgen adamdarǵa beriletin jeńildikter men olardy áleýmettik qorǵaý, jetim balalardyń, ata-analarynyń qamqorlyǵynan aıyrylǵan balalardyń turǵyn úıge sózsiz quqyǵyn saqtaı otyryp, olardyń arasynda páterler bólý úshin eń kemi jıyrma paıyzdyq kvota bekitý týraly usynystar da qabyldandy.