Memlekettik basqarý júıesindegi áıelderdiń úlesi boıynsha kósh bastap turmyz - Toqaev
«Bizdiń turaqty túrde kezdesip turýymyz jaqsy dástúrge aınaldy. Kópshiligińizben el damýynyń ártúrli máselelerin birge talqyladyq. Búgingi jıyn ortaq jumystyń birqatar qoryntyndylaryn aıqyndaýǵa arnalyp otyr. Negizgi jumystar keńes otyrystarynyń aralyǵynda júrgiziledi. Sebebi tek bastamany kóterip qoıa salý jetkilikti emes. Zań jobalaryn ázirleý, ózara mámlege kelý joldaryn izdeý kóp ýaqyt pen tabandy eńbekti talap etedi», - dedi Prezıdent.
Osy oraıda, Memleket basshysy keńes músheleri aıtqan ıdeıalarmen jáne usynystarmen muqııat tanysyp shyqqanyn aıtty.
«Bıyl mamyr aıynda «Saılaý týraly» Zańǵa Ulttyq keńes bastamasymen engizilgen ózgeristerge qol qoıǵanymdy bilesizder. Soǵan sáıkes, partııalardyń saılaýaldy tizimine áıelder men jastar úshin 30 paıyzdyq kvata engizý qajettigi zańdyq turǵydan rásimdeldi. Biz áıelderge qoldaý kórsetip, olardyń memleketti basqarý isine barynsha belsendi atsalysýyn júıeli túrde iske asyryp kelemiz. Statıstıka sáıkes barlyq memlekettik ákimshilik qyzmetshilerdiń 55 paıyzdan astamy áıelder. Sondaı-aq, Parlament pen máslıhat depýtattarynyń 22 paıyzy, sýdıalar korpýsynyń 47 paıyzy áıelderdiń enshisinde. Oǵan qosa, bıyl elimizdiń tarıhynda tuńǵysh ret áıel adam oblys basshysy boldy. Sarapshylardyń baǵalaýynsha, Qazaqstan memlekettik basqarý júıesindegi jáne bıliktiń ókildi organdaryndaǵy áıelderdiń úlesi boıynsha postkeńestik elder arasynda kósh bastap turǵan memleketterdiń biri», - dedi Qasym-Jomart Toqaev.
