Memlekettik basqarý júıesin jetildirýge baǵyttalǵan zań qabyldandy - Parlament
ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik basqarý júıesin odan ári jetildirý máseleleri boıynsha ózgerister men tolyqtyrýlar engizý týraly» zań jobasyna qos palata arasyndaǵy kelispeýshilikterdi eńserý jónindegi kelisim komıssııasynyń usynysy qaralyp, qabyldandy.
Endi Parlament qabyldaǵan qujat Memleket basshysynyń qol qoıýyna joldanady.
Eske sala keteıik, buǵan deıin senatorlar Májilis maquldaǵan zań jobasyna túzetýler engizgen bolatyn. Alaıda, Májilis tarapy keıbir túzetýmen kelispeıtindikterin bildirip, kelisim komıssııasyn qurý týraly sheshim qabyldady. Osylaısha, qos palata arasyndaǵy kelispeýshilikti eńserý jónindegi kelisim komıssııasy ózderiniń usynysyn palata qaraýyna shyǵaryp otyr.
Aıta keteıik, atalmysh zań jobasy Memleket basshysynyń 2014 jyldyń 6 tamyzyndaǵy «Qazaqstan Respýblıkasynyń memlekettik basqarý júıesin ári qaraı jetildirý sharalary týraly» Jarlyǵyn iske asyrý aıasynda ázirlengen. Jarlyqqa sáıkes, memlekettik qyzmet isteri jónindegi jáne ekonomıkalyq jáne sybaılas jemqorlyqqa qarsy kúres agenttigi taratylyp, Memlekettik qyzmet jáne jemqorlyqqa qarsy turý isi jónindegi agenttik qurylǵan edi. Osyǵan baılanysty, zań jobasynda taratylǵan agenttiktiń jemqorlyq qylmystyń jáne zań buzýshylyqtyń aldyn alý, anyqtaý, jolyn kesý, ashý, tekserý jónindegi fýnktsııalary men ókilettikterin jańa qurylǵan agenttikke, al ekonomıkalyq jáne qarjy qylmysy men zań buzýshylyqty Qarjy mınıstrligine ótkizip berý qaralǵan. Agenttik pen qarjy mınıstrliginiń tıisti bólimshelerine quqyq qorǵaý organy mártebesi beriledi.
