Memlekettik basqarý deńgeıleri arasyndaǵy ókilettikterdiń arajigin ajyratýǵa baǵyttalǵan zań jobasy maquldandy - Májilis
ASTANA. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik basqarý deńgeıleri arasyndaǵy ókilettikterdiń arajigin ajyratý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy. Eske sala keteıik, Memleket basshysy N.Nazarbaev Parlamentke atalǵan qujatty qaraýdy shuǵyl dep jarııalaǵan bolatyn.
Qujat QR Prezıdentiniń aǵymdaǵy jyldyń 24 tamyzyndaǵy Jarlyǵymen aıqyndalǵan memlekettik basqarý deńgeıleri arasyndaǵy fýnktsııalardyń arajigin ajyratý boıynsha basty qaǵıdattar men tásilderdi iske asyrady. Osy maqsatta qoldanystaǵy 15 kodeks pen 125 zańnamalyq aktilerge ózgeris engiziledi.
Bul rette mınıstrlikterdiń jetekshilik etetin salada memlekettik saıasatty qalyptastyrý jáne iske asyrýdaǵy ókilettikterin, tıisinshe jaýapkershilikti kúsheıtý bóliginde Úkimet pen ortalyq memlekettik organdardyń arasyndaǵy ókilettikterdiń arajigin ajyratý qarastyrylady.
Sonymen qatar ortalyq memlekettik organdar arasyndaǵy fýnktsııalardyń arajigin ajyratý boıynsha Energetıka mınıstrligine munaı ónimderin bólshek saýdada satýdyń shekti baǵasyn belgileý fýnktsııasy beriledi. Al Densaýlyq saqtaý jáne áleýmettik damý mınıstrliginen jáne jergilikti atqarýshy organdardan Ádilet mınıstrligine sot-medıtsınalyq, sot-narkologııalyq, sot-psıhıatrııalyq saraptamalaryn júrgizý fýnktsııalary beriledi.
Budan bólek, ortalyq memlekettik organdardan jergilikti atqarýshy organdarǵa da ókilettikter berý kózdeledi. Máselen, qurylys, turǵyn úı kommýnaldyq sharýashylyq jáne jer resýrstaryn basqarý salasynda jergilikti bılik organdaryna sáýlet, qala qurylysy jáne qurylys salasyndaǵy lıtsenzııalaý, attestattaý jáne baqylaý, jer resýrstaryn basqarý fýnktsııalary berilmek.
Aýyl sharýashylyǵy salasynda jergilikti atqarýshy organdarǵa ósimdik sharýashylyǵyndaǵy saqtandyrý men baqylaý, maqta salasyn damytý men tuqym sharýashylyǵy, bıootyn óndirisi salasyndaǵy memlekettik saıasatty iske asyrý fýnktsııalary ótedi. Odan basqa, Aýyl sharýashylyǵy mınıstrliginen jergilikti atqarýshy organdarǵa veterınarlyq baqylaý jáne qadaǵalaý komıtetiniń aýmaqtyq bólimsheleriniń shtat sanynan jergilikti atqarýshy organdarǵa bere otyryp, veterınarııa jáne tamaq ónimderiniń qaýipsizdigi salasyndaǵy baqylaý-qadaǵalaý fýnktsııalaryn júzege asyrý beriledi.
Bularmen qosa, zań jobasynda birqatar ókilettikterdi oblystyq deńgeıden aýdandyq deńgeıge berý qaralady. Atap aıtsaq, oblys aýmaǵynda sport ǵımarattaryn salý máselelerin úılestirý, shalǵaıdaǵy eldi mekenderde turatyn balalardy jalpy bilim berý mektepterine tasymaldaý tártibiniń fýnktsııalary aýdandyq deńgeıge beriledi.
