Memlekettik basqarý akademııasynda tek Astananyń sheneýnikteri ǵana oqı ma
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy kúres agenttiginiń búgingi keńeıtilgen májilisinde Prezıdent Ákimshiliginiń basshysy Ádilbek Jaqsybekov Memlekettik basqarý akademııasynda bilim berý máselesin kóterdi. Onyń aıtýynsha, búginde atalǵan oqý ornynda bilim alyp júrgenderdiń basym bóligi - astanalyqtar, al jergilikti basqarý boıynsha aımaqtardan kelip oqıtyndar óte az, dep xabarlaıdy QazAqparat.
«Qazirgi kezde akademııada dáris alatyndardyń ara salmaǵy durys saqtalmaıdy. Onda oqıtyndardyń 68 paıyzy - Astanadan jiberilgen sheneýnikter. Al «Jergilikti basqarý» mamandyǵy boıynsha oqýǵa túskenderdiń ishinde tek alty aımaqtyń ǵana ókilderi bar. Akademııa túlekteriniń memlekettik qyzmette qalýy da úlken másele bolyp tur. Sońǵy on jyldyń ishinde ol jerde 1700-den astam magıstr men doktor daıarlandy. Alaıda, olardyń qaısysy qazir memlekettik qyzmette jumys istep jatyr? Ony eshkim bilmeıdi. Sondyqtan akademııa basshylyǵy osy máseleni baqylaýǵa alyp, túlekterdi qaıda jáne qaı qyzmetke ornalasyp jatqanyn qadaǵalaý qajet», - dedi Á.Jaqsybekov.
Óz sózinde Prezıdent Ákimshiliginiń basshysy birqatar mınıstrlikterde bos oryndardyń aılap turatynyn jetkizip, olaı jalǵasa berse, ol memlekettik organdardyń shtatyn qysqartý qajettigin aıtty. Máselen, qarjy mınıstrliginde 970 qyzmet orny bos tursa, Ulttyq ekonomıka mınıstrliginde - 900-den astam, al Aýyl sharýashylyǵy mınıstrliginde 280 qyzmetke adamdy áli qoımaǵan. Oblystyq jáne aýdandyq ákimdikterde de solaı bolyp tur.
