Memlekettik baqylaýdy odan ári júıelendirýdi qarastyratyn zań jobasy ázirlendi
ASTANA. Aqpannyń 19-y. QazAqparat /Ernur Aqanbaı/ - Qazirgi ýaqytta «Jeke kásipkerlik týraly» jáne «Ákimshilik protsedýralar týraly» zańdarǵa engizilgen jańa túzetýlerdi eskere otyryp, memlekettik baqylaýdy odan ári júıelendirýdi qarastyratyn zań jobasy ázirlendi. Úkimet zań jobasyn Parlamentke birinshi toqsannyń ishinde engizetin bolady.
Bul týraly búgin Úkimet otyrysynda Ekonomıka jáne bıýdjettik josparlaý mınıstri Baqyt Sultanov aıtty, dep hzabarlaıdy QazAqparat.
Onyń aıtýynsha, quqyq qorǵaý organdary júrgizetin qosymsha tekserýlerin sanktsııalaý, jospardan tys jáne qarama-qarsy tekserýler júrgizý týraly prokýratýra organdaryn habardar etý syndy eki túzetýdi Bas prokýratýra usynǵan. Bular qabyldanǵan jaǵdaıda bıznes kúsh-qýat qurylymdary tarapynan ózderiniń qyzmetine negizsiz aralasýdan naqty qorǵalatyn bolady. «Kúsh-qýat organdary tarapynan kásipkerlikti qosymsha tekserýge prokýrordyń sanktsııasyn berýdi zańnamalyq turǵydan qarastyrǵan tótenshe mańyzdy. Mundaı jaǵdaıda sońǵylarynyń tarapynan qatty qarsy áreket bolýy múmkin ekenin biz jaqsy túsinemiz. Sondyqtan da, qurmetti Kárim Qajymqanuly, joǵarydaǵy usynystardy jobaǵa qysqa merzimde engizýdi jáne Sizdiń tóraǵalyǵyńyzben keńes ótkizýdi hattamalyq túrde tapsyrýyńyzdy ótinemin. Qoldaý bolǵan jaǵdaıda biz zań jobasyn birinshi toqsannyń ishinde Parlamentke engizetin bolamyz», dedi mınıstr.
Otyrystan keıin jýrnalısterge bergen suhbatynda B. Sultanov bul arada qosymsha tekserýlerge prokýrorlyq sanktsııa engizý jaıly sóz bolyp otyrǵanyn aıtty. Onyń aıtýynsha, qazirgi ýaqytta respýblıkada árbir quqyq qorǵaý organy qosymsha tekserý mehanızmin iske qosyp, kez-kelgen bıznes ortaǵa kire alatyny jóninde norma bar. «Bul jemqorlyq jáne reıderlik elementter úshin jaqsy syltaý. Sondyqtan da Bas prokýratýra tarapynan osyndaı tejeý qoıý qajet», dedi ol.
