Memlekettik baqylaý jáne qadaǵalaý týraly zań jobasyna engizilgen ózgerister qabyldandy - Májilis
ANA. 15 jeltoqsan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasyndaǵy memlekettik baqylaý jáne qadaǵalaý týraly» zań jobasyna Senat tarapynan engizilgen ózgeristerdi talqylap, qujatty qabyldady.
Esterińizge sala keteıik, zań jobasy Memleket basshysynyń 2008 jylǵy 6 qarashadaǵy Sybaılas jemqorlyqqa qarsy forýmda júktegen tapsyrmasyn oryndaý maqsatynda ázirlenip otyr. Bul rette zań jobasymen memlekettik organdardyń baqylaýshylyq-qadaǵalaýshylyq qyzmetin júzege asyrý máselelerin jalpy retteý jáne onyń negizgi prıntsıpterin bekitý úshin biryńǵaı quqyqtyq negiz qalyptastyrý kózdeledi. Sonymen qatar quqyqtyq retteýdiń belgilegen salalarynyń ózindik erekshelikterin eskere otyryp, baqylaý-qadaǵalaý júrgizýdi salalyq zańnamalyq aktilerde qaldyrý usynylady. Máselen, zań jobasynyń kúshi prokýratýra júzege asyratyn qylmystyq is boıynsha sotqa deıingi is júrgizý, jedel izdestirý qyzmeti barysyndaǵy baqylaý men qadaǵalaýǵa, memlekettik qupııalar týraly zańnama talaptarynyń saqtalýyn baqylaýǵa, ınvestıtsııalardy júzege asyrýǵa arnalǵan kelisimsharttar talaptarynyń saqtalýyn baqylaýǵa baılanysty qoldanylmaıtyn bolady.
Budan basqa, zań jobasymen tekseriletin sýbektilerdi táýekeli joǵary, ortasha nemese bolmashy toptarǵa jatqyzǵan kezde josparly tekserýler júrgizýdiń kezeńdiligi aıqyndalady. Baqylaý, qadaǵalaý júrgizý kezinde memlekettik organdardyń laýazymdy adamdarynyń tekseriletin sýbektiler boıynnsha quqyqtary men mindetteri belgilenedi.
Senat tarapynan engizilgen túzetýler jobanyń tujyrymdamasyna qaıshy kelmeıdi ári olardyń basym bóligi redaktsııalyq naqtylaý sıpatynda bolyp otyr.
