Memlekettik baqylaý talaptaryn buzǵan 220 laýazym ıeleri jaýapkershilikke tartyldy

ASTANA. QazAqparat - Ústimizdegi jyly da Bas prokýratýranyń Quqyqtyq statıstıka jáne arnaıy esepke alý jónindegi komıteti tekserý júrgizýde memlekettik baqylaý jáne qadaǵalaý týraly zańnama talaptary múltiksiz saqtalýyn qadaǵalaýdy qamtamasyz etýge baǵyttalǵan jumystardy jalǵastyrdy.

«Tıimdi atqarylǵan sharalar nátıjesinde júrgizilgen tekserýler sany kemýiniń oń úrdisi baıqalady. Bıylǵy 5 aıda ótken jyldyń osy merzimimen salystyrǵanda jalpy tirkelgen tekserýler sany 2 paıyzǵa (47 086-dan 46 008-ge) tómendegen. Sondaı-aq, bıznes sýbektilerin tekserý 22 paıyzǵa (22 367-den 17 535-ke) azaıdy»,-delingen komıtet málimetinde.

Tekseriletin sýbektilerdiń qyzmetine zańsyz aralasýdan qorǵaý maqsatynda Komıtet 423 tekserý taǵaıyndaý aktisin tirkeýden bas tartty, onyń ishinde 197-i jeke kásipkerlerge qatysty. 117 zańsyz tekserý anyqtalyp, sonyń 14-i jeke kásipkerlerge qatysty bolyp shyqty.

«Memlekettik organdar boıynsha tekserýdi tirkeýden bas tartýdyń basym bóligi tutynýshylardyń quqyqtaryn qorǵaý-78, órtke qarsy qyzmet-57, salyq qyzmeti-49, sondaı-aq eńbek ınspektsııasyna qatysty 45 tekserýden bas tartyldy»,-dep atap ótilgen vedomstvo habarlamasynda.

Atalǵan merzimde memlekettik baqylaý jáne qadaǵalaý týraly zańnamanyń talaptaryn buzǵany úshin qoldanylǵan prokýrorlyq sharalarmen memlekettik organdardyń 220 laýazymdy tulǵasy zańmen qaralǵan jaýapkershilikterge tartyldy.