Memlekettik baqylaý men qadaǵalaýǵa arnalǵan zań jobasy tanystyryldy
ASTANA. Qazannyń 28-i. QazAqparat /Qanat Mámetqazyuly/ - Búgin QR Parlamenti Májilisinde «Qazaqstan Respýblıkasyndaǵy memlekettik baqylaý jáne qadaǵalaý týraly» zań jobasynyń tanystyrylymy bolyp ótti.
Atalǵan zań jobasy Memleket basshysynyń 2008 jylǵy qarashanyń 6-synda sybaılas jemqorlyqqa qarsy kúreske arnalǵan forýmda bergen tapsyrmalaryn oryndaýǵa baǵyttalǵan bolatyn. Bul rette memlekettik ákimshilik organdarynyń baqylaý men qadaǵalaýy bir jaǵynan memlekettik basqarýdy, ekinshi jaǵynan zańdylyqty qamtamasyz etý tásilderin bildiredi. Sonymen qatar, qujat ınstıtýtsıonaldyq uıymdastyrý jáne osy qyzmettiń mazmuny jaǵynan, tekserýshiler men tekseriletinderdiń tikeleı baılanystary jaǵynan da ózekti bolyp tabylady.
Zań jobasymen memlekettik organdardyń baqylaý-qadaǵalaý qyzmetiniń jalpy máselelerin retteýge jáne onyń negizgi qaǵıdalaryn belgileýge biryńǵaı quqyqtyq negiz qalypatastyrý kózdeledi. Bul rette quqyqtyq retteýge qatysty jeke salaladyń ereksheligin eskere otyryp, memlekettik baqylaý jáne qadaǵalaý júrgizýdi salalyq zańnamalyq aktilerde qaldyrý usynylady. «Zań jobasynyń jańalyǵy mynadaı: memlekettik organdardyń tek sharýashylyq sýbektileri ǵana emes, organdardyń ózderine qatysty baqylaý jáne qadaǵalaý fýnktsııalaryn iske asyrý tártibin jetildirý qarastyrylǵan. Sonymen birge, alǵash ret zańdy túrde «baqylaý» jáne «qadaǵalaý» uǵymyn ajyratý sharalary kózdeledi. Budan bólek, zań jobasynda tekserýlerdi uıymdastyrý, júrgizý tártipteri qarastyrylady», dedi qujat boıynsha baıandama jasaǵan QR Ádilet vıtse-mınıstri Dýlat Qusdáýletov.
Budan bólek, zań jobasymen baqylaý jáne qadaǵalaý túrleri belgilenedi. Baqylaýǵa jatatyn sýbektilerge tekserýdi júzege asyrý máseleleri retteledi.
