Memlekettik baǵdarlamanyń aqshasyn maqsatsyz jumsap jatqandar ustaldy
ASTANA. 25 shilde. QazAqparat - 23 shilde kúni qylmystyq isti qozǵaýdy toqtatý maqsatynda qarjy polıtsııasynyń ınspektoryna 2 mln. teńge kóleminde para bermek bolǵan Shymkent qalasynyń «Turǵyn úı» MKKM burynǵy dırektory N. Tórejanov jáne «Strong Bazıs» JShS jetekshisi M. Jamalov qolǵa tústi.
Qarjy polıtsııasynyń baspasóz qyzmeti habarlaǵandaı, osy ýaqytqa deıin «Turǵyn úı-kommýnaldyq sharýashylyqty jetildirý» memlekettik baǵdarlamasy aıasynda Shymkent qalasynyń Qonaev býlvarynda ornalasqan úılerdi jóndeý úshin bólingen 5 mln. teńgeden astam bıýdjet qarajatynyń jumsalý jaıy tekserilgen bolatyn. Atalǵan joba boıynsha tapsyrýshy «Turǵyn úı» MKKM, al «Strong Bazıs» JShS merdiger bolǵan. «Aǵymdaǵy jylǵy 24 shildede Tórejanov pen Jamalovqa qatysty QR QK 312-babynyń 4-bóligi «a,b» tarmaqtary boıynsha qylmystyq is qozǵaldy. Qazirgi ýaqytta olarǵa qatysty bultartpaý sharasyn taǵaıyndaý máselesi sheshilýde», - delingen baspasóz habarlamasynda.
