Memlekettik baǵdarlamany synaı bermeı, oǵan balama baǵdarlama usyný kerek - Sovethan Ǵabbas
ALMATY. Qyrkúıektiń 23-i. QazAqparat /Erbol Turymbetov/ - Memlekettik baǵdarlamany synaı bermeı, oǵan balama baǵdarlama usyný kerek. Bul týraly búgin Almatyda ótken «Mektepterde dintaný pániniń oqytylǵanyna 1 jyl: sapasy qalaı, salmaǵy qandaı?» atty semınar-trenıngte aıtyldy, dep habarlaıdy QazAqparat.
Semınardy «Alash úni» qoǵamdyq birlestikter odaǵy «Jeruıyq» qoǵamdyq birlestigimen birlese uıymdastyrdy. Otyrysqa birqatar qoǵamdyq uıym ókilderimen birge, «Shalqar» gazeti men «Shalqar» radıosy ókilderi qatysty. Onda elimizdiń orta mektepteriniń oqý baǵdarlamasyna engizilip otyrǵan «Dintaný negizderi» pániniń durys oqytylýy, oqýlyqtardyń sapalylyǵy jáne basqa da ózekti máseleler sóz boldy.
«Mekteptiń oqý baǵdarlamasyna engizilip otyrǵan «dintaný negizderi» pániniń úlken mańyzy bar. Bul máselede oqýshylarǵa oqytatyn sabaqtardyń sapalylyǵyna asa mán berip, oqytý barysynda olqylyqtarǵa jol berilmeýi kerek. Sondyqtan memlekettik deńgeıde qolǵa alynyp otyrǵan baǵdarlamany synaı bermeı, sheshý joldaryn qarastyryp, oǵan balama baǵdarlama usyný kerek», deıdi «Alash úni» qoǵamdyq birlestikter odaǵynyń tóraǵasy, jazýshy Sovethan Ǵabbasov.
Atalmysh pán «QR Prezıdentiniń «Terrorızm men ekstremızm kórinisteriniń aldyn alý jáne tyıý jónindegi sharalar týraly» 2000 jylǵy 10-shy aqpandaǵy №332-shi Jarlyǵyna sáıkes 2004 jyldan bastap 10-shy synyptarda arnaıy kýrs retinde oqytylyp kelgen edi. Al 2009-2010 oqý jylynan bastap oqýshylardyń jas erekshelikteri eskerile otyryp 9-shy synyptarǵa fakýltatıvti sabaq retinde engizildi.
Otyrys barysynda sonymen qatar, 6-shy qazanda ótetin úkimettik emes uıymdardyń 5-shi forýmy jaıynda da áńgime boldy.
