«Memlekettik baǵdarlamamen úı alyp beremin»: Semeılik áıel 4 adamdy aldap soqty
SEMEI. QazAqparat – Semeı qalasynda birneshe adamdy tuzaqqa túsirgen ákki alaıaq ustaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, «102» jedel arnasyna 57 jastaǵy azamat qońyraý shalǵan. Óz sózinde ol tanysynyń memlekettik baǵdarlama boıynsha páter alýǵa kómektesemin dep aldaǵanyn jetkizdi. Buǵan sengen jábirlenýshi oǵan 1 000 000 teńge bergen.
«Sol kúni uqsas qylmys boıynsha Semeı qalasynyń 38 jastaǵy turǵynynan aryz tústi. Belgili bolǵandaı, qazan aıynyń ortasynda alaıaq oǵan avtokólikti kepilden satyp alýǵa kómektesetindigin aıtyp sendirgen. Keltirilgen zalal mólsheri – 500 000 teńgeni qurap otyr», - delingen habarlamada.
Jedel-izdestirý sharalary barysynda polıtsııa qyzmetkerleri kúdiktini qolǵa túsirdi. Ol 51 jastaǵy jumyssyz áıel bolyp shyqty. Tergeý barysynda semeılik azamatsha óz kinásin moıyndaǵan.
«Kúdikti ustalǵannan keıin onyń qurbany bolǵan taǵy eki adam polıtsııaǵa júgindi. Anyqtalǵandaı, 27 qazanda 64 jastaǵy zeınetker memlekettik baǵdarlama boıynsha páter satyp alǵysy kelip, alaıaqqa 90 000 teńge bergen. Al 32 jastaǵy shahar turǵyny dál osy shema boıynsha aldanyp, ákki áıeldiń qolyna 216 000 teńge ustatqan», - delingen aqparatta.
Qazirgi ýaqytta kúdiktige qatysty QR QK-niń 190-baby 3-bóligine sáıkes tergeý amaldary jalǵasýda.
