Memlekettik baǵdarlamalarǵa bólingen bıýdjet qarajattaryn urlaý laýazymdy tulǵalar men merdigerlerdiń aldyn ala sóz baılasýy arqyly jasalady - Qarjy polıtsııasy
ASTANA. 23 aqpan. QazAqparat - Memlekettik baǵdarlamalarǵa bólingen bıýdjet qarajattaryn urlaý kóbinese laýazymdy tulǵalar men merdigerlerdiń aldyn ala sóz baılasýy arqyly jasalady.
Bul týraly búgin QR Ekonomıkalyq jáne sybaılas jemqorlyqpen kúres agenttiginiń resmı ókili Murat Jumanbaı málim etti.
Máselen, resmı ókildiń sózine qaraǵanda, Almaty oblysynda Qaratal aýdandyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń bastyǵy Qusaıynovtyń «Aýyz sý» baǵdarlamasy boıynsha bólingen bıýdjet qarajatyn júıeli túrde urlaǵandyǵy anyqtaldy. Ol «Stroı Polımer ı Detal», «ST-ENGINEERING» JShS-larynyń dırektorlary Lýkıanov jáne Nııazbaevpen sóz baılasý arqyly Eskeldi aýlynyń sýmen qamtamasyz etý júıelerin jáne Úshtóbe qalasyndaǵy káriz júıelerin qaıta qurý boıynsha atqarylǵan jumystardyń jalǵan aktilerine qol qoıyp, tólem júrgizgen. «Nátıjesinde 24 mln. teńgeni urlaýǵa kómektesken Qusaıynovqa aıyppul tóleý jazasy kesildi», - dedi ol.
Sonymen qatar Mańǵystaý oblysy Qaraqııa aýdandyq qurylys bólimi bastyǵynyń mindetin atqarýshysy Tadjaıaqov 2,6 jylǵa sottaldy. Ol jeke basyna paıda tabý jáne «Sezar» JShS-ine artyqshylyqtar berý maqsatynda 2008 jyly Munaıshy aýlynda sý qubyrlarynyń qurylysy boıynsha atqarylǵan jumystar týraly jalǵan qabyldaý aktilerine qol qoıyp, memleketke 19 mln. teńge zalal keltirgen.
