Memlekettik baǵdarlama: Sportpen shuǵyldanǵysy keletin balalar sany artty
Qazirgi bessaıystan QR sport sheberi, júzý boıynsha jattyqtyrýshy Danıl Varsanovtyń aıtýynsha, Almatyda qazirgi ýaqytta júzýmen aınalysqysy keletinderdiń qatary kóp.
«Bizge jáı júzýdi úırengisi keletin balalar da keledi. Jattyǵý kezinde biz júzý tehnıkasyn úırenemiz. Topta ádette 15-ten 20 adamǵa deıin bolady. Sabaqtar 45 mınýttan ótkiziledi», - deıdi ol. Sondaı-aq ol jan basyna qarjylandyrý baǵdarlamasy ashylǵaly beri sportpen shuǵyldanǵysy keletin balalardyń sany artqanyn, ata-analar da balalaryn bos ýaqyttaryn tıimdi ótkizý úshin úıirmelerge jaqsy yntamen berip jatqanyn aıtty.
Almatyda jan basyna qarjylandyrý baǵdarlamasy boıynsha sport úıirmesine qatysyp júrgen almatylyq balanyń biri - Nurasyl Halıla.
«Ótken jyldyń qarasha aıynda dzıýdoǵa jazyldym. Budan bólek, men júzýge de baramyn. Maǵan dzıýdo unaıdy. Jaqynda ótken alǵashqy jarysymda ekinshi oryn aldym. Alda kóptegen jattyǵýlar bar. Bolashaqta Eldos Smetov sııaqty kásibı sportshy bolǵym keledi. Meniń basty tálimgerim - ákem. Ol da zaldan tys jerde menimen kóp aınalysady», - dedi N. Halıla.
Saıat Barlyqbekuly 12 jylǵa jýyq ýaqyt balalardy karate - kıokýshınkaıdan jattyqtyrady. QR sport sheberi. Ekinshi dannyń qara belbeýiniń ıegeri.
«Bizdiń klýbta 4-ten 18 jasqa deıingi balalar jattyǵady. Karate balany tártip pen jaýapkershilikke úıretedi. Qazir bizdiń klýbta 200 bala tegin jattyǵady. Jan basyna normatıvtik qarjylandyrýdy engizý negizinen kóp balaly ata-analarǵa kómektesti. Mysaly, birneshe balasy bar otbasylar túrli úıirmelerge qatysýǵa múmkindik aldy. Meniń oıymsha, bul balalar sportyn damytý úshin memleket tarapynan úlken qoldaý. Sebebi, sportta úlken tárbıe jatyr», - dedi karate jattyqtyrýshysy.
Aııa keteıik, Almaty Arena sport kesheninde jumys isteıtin barlyq úıirmeler derlik memlekettik jan basyna qarjylandyrý baǵdarlamasyna qatysady.
«Bul baǵdarlama boıynsha operatordyń maquldaýynan sporttyń 11 túri boıynsha 15 sport úıirmesi ótti. Búgingi tańda sport baǵyty boıynsha bizde 2,5 myń bala aınalysady. Taǵy 1000-ǵa jýyq bala Almaty Arena-daǵy bizdiń úıirmelerge qatysý kirý úshin vaýcher berilýiniń ashylýyn kútýde. Bizdiń barlyq úıirmeler suranysqa ıe, degenmen, basseınge degen suranys óte joǵary bolyp tur. Sporttan basqa bizde shyǵarmashylyq baǵyttar da belsendi damýda. Biz olardyń damýyna da kómektesemiz», - dedi áleýmettik jaýapkershilik aıasynda mektep sporty máseleleri boıynsha jetekshilik etetin Fırýza Sýpıeva.
Aıta keteıik, aǵymdaǵy jyly megapolıste memlekettik sporttyq tapsyrysty júzege asyrýǵa 3,2 mlrd teńge bólindi.
