Memlekettik aıyptaýshy tergeý jetegimen ketpeýi tıis – Bas prokýror

ASTANA. QazAqparat – Memlekettik aıyptaýshy tergeý jetegimen ketpeýi tıis. Bul týraly Memlekettik aıyptaýshylar forýmynda Bas prokýror Berik Asylov aıtty, dep habarlaıdy QazAqparat tilshisi.

«Memlekettik aıyptaýshynyń negizgi róli – bul jazanyń bultartpastyǵy prıntsıpin qamtamasyz etý ekendigi túsinikti. Biraq, búgin forým qatysýshylarynyń nazaryn memlekettik aıyptaýshynyń quqyq qorǵaý róline basa nazar aýdartqym keledi. Muny azamattar bárinen de buryn kútip otyr. Memlekettik aıyptaýshy tergeý jetegimen ketpeýi tıis. Onyń negizgi mindeti sotqa sottalýshynyń kináli ne kinásiz ekendigin uǵynýǵa kómektesý. Eger aıyptaý dáleldenbese, onda tergeýmen jalǵan nıettestiktiń nemese «mýndır abyroıy» úshin aıyptaýdy jaqtaýdyń esh qajet joq. Aıyptaýǵa beıimdik qajet emes», - dedi Bas prokýror.

Onyń atap ótýinshe, prokýror sotta ádil, ádil ári beıtarap bolýy tıis.

«Bul úshin ol is materıaldaryn minsiz bilýi, jaýap alýdy saýatty júrgizýi, taraptar men sotqa óz ustanymyn jetkize bilýi, óz oıyn anyq ári naqty jetkizýi qajet. Memlekettik aıyptaýshy dálelderdi usynǵannan keıin protseske qatysýshylardyń birde-birinde onyń shynaıylyǵyna qatysty esh kúmán qalmaýy tıis. Eger, prokýror saýatty ári senimdi bolsa, onda oǵan senim artady. Shaǵym da, syn da azaıady», - dedi Berik Asylov.