Memlekettik aıyptaýshy Bolat Baqaýovty 3,5 jylǵa sottaýdy surady
Memlekettik aıyptaýshy Elena Belova Pavlodar oblysynyń burynǵy ákimi Bolat Baqaýovty memlekettik qyzmette qyzmet atqarý quqyǵynan ómir boıyna aıyra otyryp, úsh jarym jylǵa bas bostandyǵynan aıyrýdy surady. Basty sot protsesi búgin saǵat 11.30-da Pavlodar qalasynda, № 2 qylmystyq sotta bastaldy.
Bolat Baqaýovtyń qorǵaýshysy Ashýrbek Ashýrbekov burynǵy óńir basshysy tergeýmen kelisip, kinásin moıyndaǵanyn jáne keltirilgen shyǵynnyń ornyn toltyrǵanyn málimdedi. Bolat Baqaýov bes balany, onyń ishinde tórt kámeletke tolmaǵan balany tárbıelep otyr. Sottalýshynyń qorǵaýshysy Baqaýovtyń múligine salynǵan tyıymdy alyp tastaýdy ótindi.
Protsess mobıldi beınekonferentsııa arqyly ótip jatyr, sottalýshy Baqaýov, memlekettik aıyptaýshy, qorǵaýshy jáne BAQ ókilderi onlaın qosyldy. Sottalýshy men onyń qorǵaýshysy, prokýror olardyń beınelerin BAQ betterinde qoldanýǵa qarsylyq bildirmedi.
Esterińizge sala ketsek, osy jyldyń 16 qańtarynda QR Ulttyq qaýipsizdik komıteti Pavlodar oblysynyń ákimi Bolat Baqaýovqa qatysty qylmystyq isti tergep jatqany belgili bolǵan edi.
«Ulttyq qaýipsizdik komıteti 2020 jylǵy 15 qańtarda Pavlodar oblysynyń ákimi Bolat Baqaýovqa qatysty laýazymdyq ýákilettigin asyra paıdalaný faktisi boıynsha QR QK-niń 362-baby 2-bóligi 3-tarmaǵy boıynsha tirkelgen qylmystyq iske sáıkes jedel-tergeý sharalaryn júrgizdi. Qazirgi ýaqytta tergeý amaldary jalǵasýda. Osy kezeńde tergeý múddesine oraı tolyq derekter jarııalanýǵa jatpaıdy», - delingen UQK aqparatynda.
Bolat Baqaýov 18 aqpannan beri úıqamaqta otyr.
Sáýirde ony úıqamaqta ustaý merzimi mamyr aıyna deıin sozyldy.