Memlekettik aýdıtti halyqaralyq standarttarǵa kóshirýdi qarastyratyn zań jobalary qaraldy
ASTANA. QazAqparat - 8 qazanda Parlament Senaty Ekonomıka jáne qarjy komıtetiniń keńeıtilgen otyrysynda «Memleketik aýdıt jáne qarjylyq baqylaý týraly» zań jobasy qaraldy.
Zań jobasy Memleket basshysynyń bes ınstıtýttyq reformasyn iske asyrý jónindegi 100 naqty qadam - Ult josparyn oryndaý aıasynda ázirlengen bolatyn.
Ult josparynyń «Aýdıttiń jańa júıesin engizý jáne memlekettik apparattyń jumysyn baǵalaý» jónindegi 93-shi qadamyna sáıkes aýdıt júıesin jańǵyrtý «Esep komıteti birinshi synypty álemdik aýdıtorlyq kompanııalar úlgisimen jumys isteıtin bolady jáne aǵymdaǵy operatsııalyq baqylaýdan shyǵarylýyn» kózdeıdi. Qabyldanatyn zańnyń erejeleri aýdıtti halyqaralyq standarttarǵa kóshirýdi qarastyrady.
Qujat Respýblıkalyq bıýdjettiń atqarylýyn baqylaý jónindegi esep komıtetiniń ókilettigin keńeıtedi. Atap aıtqanda, Esep komıteti respýblıkalyq bıýdjet jobasyn aldyn ala baǵalaý, jınaqtalǵan qarjylyq esep berýdiń (respýblıka deńgeıinde) jyl saıynǵy aýdıtin iske asyrý, memlekettik qaryzdy qalyptastyrý jáne basqarý, elimizdiń Ulttyq Bankiniń aýdıti sekildi jańa mindetterge ıe bolady. Esep komıtetine sondaı-aq qarjy-ekonomıka salasyndaǵy ulttyq qaýipsizdikti anyqtaý, taldaý, baǵalaý jáne boljaý jónindegi ókilettikter de beriledi. Joba memlekettik aýdıt jáne qarjylyq baqylaý salasyndaǵy Úkimettiń quzyretin belgileıdi. Memlekettik aýdıt jáne qarjylyq baqylaýdyń biryńǵaı derekter bazasyn qurý kózdelip otyr, ol ýákiletti organdardyń ózara is-qımylyn jaqsartady jáne tekserýlerdi azaıtady. Keıinnen attestatsııalaýdan ótetin memlekettik aýdıtorlardy sertıfıkattaýdyń táýelsiz júıesin engizý qarastyrylýda. Sondaı-aq «Qazaqstan Respýblıkasynyń keıbir zańnamalyq aktilerine memlekettik aýdıt jáne qarjylyq baqylaý máseleleri boıynsha ózgerister men tolyqtyrýlar engizý týraly» zań jobasy da qaraldy. Zań jobasy memlekettik bıýdjet qarjysyn paıdalaný barysynda ákimshilik quqyq buzýshylyq oryn alǵan jaǵdaıda memlekettik aýdıt jáne qarjylyq baqylaý organdaryna áreket etý salasyna ókilettikter beredi. «Memleketik aýdıt jáne qarjylyq baqylaý týraly» jańa zań ázirlenýine baılanysty memlekettik qarjy baqylaý máselelerin retteıtin birqatar zańnamalyq aktilerge ózgerister engiziledi. Parlamentte Esep komıtetiniń quqyqtaryn júzege asyrýǵa baǵyttalǵan erejeler belgilenedi.
Zań jobalary Palatanyń qaraýyna jiberildi.
