Memlekettik aýdıtorlar tekserý júrgizgen nysandaryndaǵy zańsyz áreketterdi jasyryp qalǵan

ASTANA. QazAqparat - Sybaılas jemqorlyqqa qarsy qyzmet bilim berý salasyndaǵy iri jymqyrý áreketterin tergeýdi jalǵastyrýda, dep habarlaıdy QazAqparat QR Sybaılas jemqorlyqqa qarsy is-qımyl agenttiginiń baspasóz qyzmetine silteme jasap.

Qylmystardy memlekettik aýdıtorlar jasyrǵan, buny qylmystyq isterdiń materıaldary rastap otyr.

Máselen, Jetisý oblysynda bıýdjet qarajaty «óli jandardyń» shottaryna aqsha aýdarý jáne mektep qyzmetkerleriniń jalaqysyn asyra eseptep, keıinnen olardy qolma-qol aqshaǵa aınaldyrý men ıemdený arqyly urlanǵan.

Tergeý barysynda Almaty oblysy Tekserý komıssııasynyń memlekettik aýdıtory 500 myń teńge somasynda para alǵany áshkerelendi. Ol Taldyqorǵan qalasyndaǵy mektepterdiń birinde aýdıtorlyq tekseristiń oń qorytyndysy úshin para alǵan.

Qazirgi ýaqytta aýdıtor sotqa tartyldy.

Osyǵan uqsas fakt Almaty oblysynda anyqtaldy, onda oblystyq tekserý komıssııasy bóliminiń basshysy Qarasaı aýdanynyń bilim bóliminiń býhgalterinen aýdıtorlyq tekserýdiń oń nátıjeleri úshin 1 mln teńge somasynda para alǵan.

Osy fakti boıynsha Almaty oblysynyń Sybaılas jemqorlyqqa qarsy qyzmeti sotqa deıingi tergeý júrgizip jatyr.

Sonymen qatar, Túrkistan oblysynda memlekettik revızor - oblystyq Tekserý komıssııasynyń bas ınspektory paraqorlyqpen áshkerelendi.

Oǵan Saryaǵash aýdanyndaǵy mektepterdiń birinde aýdıtorlyq tekseristiń oń qorytyndysy úshin 26 mln teńge kóleminde para aldy dep kúdik keltirilip otyr.

Kúdikti ustalyp, ýaqytsha ustaý ızolıatoryna qamaldy.

Qylmystyq-protsestik kodeksiniń 201-babyna sáıkes ózge de aqparat jarııa etýge jatpaıdy.

Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.