Memlekettik apparattyń jumysy túbegeıli jańarady - rektor Jaqypova
ASTANA. QazAqparat - QR Prezıdenti janyndaǵy Memlekettik basqarý akademııasynyń rektory Fatıma Jaqypovanyń aıtýynsha, eki-úsh jylda memlekettik apparattyń jumysy túbegeıli ózgerip, strategııalyq sıpatqa ıe bolady, dep xabarlaıdy QazAqparat tilshisi.
«Negizi, qazirdiń ózinde memlekettik apparat zaman talabyna saı basqarý ádisterin qoldanyp keledi. Ony Úkimet quramynan anyq baıqaýǵa bolady. Mınıstrler batyl bastamalardy kóterip, progressıvti ádis-tásilderge basymdyq berip jatyr. Premer-Mınıstr de, vıtse-premerler de sondaı. Máselen, Asqar Qýanyshuly (Úkimet basshysynyń orynbasary - avt.) Qazaqstandy tsıfrlandyrý sharalarymen tyǵyz aınalysýda. Bul protsessti toqtatý múmkin emes. Menińshe, aldaǵy eki-úsh jylda biz kásibı memlekettik apparattan strategııalyq memapparatqa keletin bolamyz», - dedi F.Jaqypova búgin Astanada ótken baspasóz máslıxatynda.
Rektordyń aıtýynsha, qazirgi kezde keıbir qoǵam belsendileri áleýmettik jeliler arqyly memlekettik qyzmetti basqa qyrynan kórsetse de, shyn máninde, memqyzmetshilerdiń ózderi jańasha jumys isteý qajettigin jaqsy túsinedi.
«Olar jańasha jumys isteýdi bastady. Solaı bolýy kerek. Ony da jaqsy túsinedi. Sondyqtan eki-úsh jylda memqyzmetshilerdiń jumysy múldem jańasha júrgiziledi, túbegeıli jańarady», - dep atap kórsetti F.Jaqypova.
Aıta keteıik, brıfıng barysynda rektor basshysy sybaılas jemqorlyq máselesine de toqtaldy. Onyń sózine qaraǵanda, memqyzmetshilerdiń ar-uıatyn áli de ushtaý qajet.
