Memlekettik alym engizý ımporttalatyn jáne elimizde shyǵarylatyn kólikterdiń baǵasyna áser etpeıdi - T.Nurashev
ASTANA. QazAqparat - Memlekettik alym engizý ımportalatyn da, elimizde shyǵarylatyn avtokólikterdiń de baǵasyna áser etpeıdi. Bul týraly búgin Senattyń jalpy otyrysynda QR Investıtsııalar jáne damý mınıstrligi Indýstrııalyq damý jáne ónerkásiptik qaýipsizdik komıtetiniń tóraǵasy Tımýr Nurashev málim etti. Eske salaıyq, senatorlar «Qazaqstan Respýblıkasynyń keıbir zańnamalyq aktilerine ındýstrııalyq-ınnovatsııalyq saıasat máseleleri boıynsha ózgerister men tolyqtyrýlar engizý týraly» zań jobasyn talqylaǵan bolatyn.
Talqylaý barysynda senatorlar tarapynan zań jobasymen kózdelgen avtokólikterdi tirkeý qunynyń 500 esege ósýi halyqtyń narazylyǵyn týdyryp, ózimizde shyǵarylatyn avtokólik baǵasynyń kúrt qymbattaýyna soqtyrmaı ma degen kúdikter aıtylǵan edi. Óz kezeginde vedomstvo basshysy Áset Isekeshev atalǵan másele jiti zerdelengenin, álemdik tájirıbe talqylanǵanyn atap ótti. Onyń aıtýynsha, barlyq taraptyń múddeleri eskerile otyryp, osyndaı sheshim qabyldanǵan. Al Indýstrııalyq damý jáne ónerkásiptik qaýipsizdik komıtetiniń tóraǵasy Tımýr Nurashevtyń aıtýynsha, avtokólikterdi tirkeýge qatysty bastapqy memlekettik alym búgingi qoldanystaǵy ımporttyq kedendik bajdy esepteı otyryp bekitilip otyr.
«Eger halyqtyń suranysy joǵary avtokólikti alsaq, oǵan engiziletin bastapqy alymy qazir qoldanylyp otyrǵan ımporttyq kedendik bajdan aspaıdy. Máselen, úsh jylǵa deıingi avtokólikterdi alyp qarasaq, alym mólsheri búgin alynatyn mólsherge qaraǵanda 2,5 myń dollarǵa tómen bolady. Qazir ımporttyq baj ákelinetin avtokólikke 30-35 paıyzdy quraıdy, onyń ústinen avtokólik dvıgateliniń kólemine qatysty tólenetin alymdar da bar. Endi 2016 jyldan bastap bizde kedendik baj 19 paıyza deıin tómendeıdi, basqa alym múldem bolmaıdy. Osyǵan baılanysty zań jobasynda qamtylǵan bastapqy bir rettik memlekettik alymdardy engizý elimizge ımporttalatyn da, Qazaqstanda shyǵarylatyn avtokólikterdiń de baǵasyn ózgertpeıdi», - deıdi Tımýr Nurashev.
