Memlekettik áleýmettik tapsyrys nátıjelerine baǵalaý engizildi
«Úkimettik emes uıymdar elimizdiń qoǵamdyq-saıası protsesterine yqpal etetin belsendi azamattyq qoǵam ınstıtýttarynyń biri bolyp otyr. Úkimettik emes uıymdar naqty áleýmettik qamtý sektoryna aınalýda. Statıstıkalyq málimetterge sáıkes, qazirgi kezde azamattyq qoǵam salasynda 29 myńnan astam adam qamtylǵan. Elimizde ÚEU sektoryn memleket tarapynan qoldaýdyń naqty tetikteri qalyptasqan. Bul rette memlekettik áleýmettik tapsyrys, granttyq qarjylandyrý jáne syılyqaqylar eskerilgen», -dedi Din isteri jáne azamatyq qoǵam mınısti Darhan Káletaev.
Usynylǵan zań jobasy memlekettik áleýmettik tapsyrys, granttyq qarjylandyrý jáne syılyqaqylar salasyndaǵy zańnamany jetildirý maqsatyndaǵy QR Úkimetiniń Zańdy jobalaý jumystary josparyna sáıkes ázirlendi. Qujat normalaryn ázirleý barysynda eń ozyq tájirıbeler esepke alyndy. Ulybrıtanııa, Kanada, AQSh, Polsha, Frantsııa men Horvatııa sııaqty elderdiń halyqaralyq tájirıbesi zerdelendi. Shetelderde úkimettik emes uıymdar qyzmetiniń mańyzdy aspektisi ol - esep berý. Óıtkeni qoǵam osy derekterdiń kómegimen úkimettik emes uıymdar qyzmetiniń mánin túsinedi. Zań jobasynyń negizgi mindetteri memlekettik áleýmettik tapsyrystyń iske asyrylýyn jetildirýge baǵyttalǵan.
«Birinshiden, zań jobasynda maqsatty toptardyń qajettilikterine taldaý jasaý, zerdeleý jáne ÚEU usynystary negizinde memlekettik áleýmettik tapsyrysty qalyptastyrý protsesiniń biryńǵaı tásilderi belgilengen. Qazirgi ýaqytta memlekettik organdar memlekettik áleýmettik tapsyrys taqyryptary men olarǵa jumsalatyn qarjy kólemin qalyptastyrýda túrli tásilder qoldanady. Alaıda maqsatty toptardyń qajettilikteri tıisti deńgeıde esepke alynbaǵan. Qujat aıasynda «Memlekettik áleýmettik tapsyrysty qalyptastyrý» túsinigi engiziledi. Qalyptastyrý protsesi zańǵa táýeldi aktilermen anyqtalatyn bolady jáne turǵyndardyń qajettilikterin esepke alady», - dep atap ótti vedomstvo basshysy.
Atap aıtqanda, azamattar men úkimettik emes uıymdar tıisti memlekettik organdarǵa usynystardy jiberý arqyly atalǵan protseske belsendi qatysý múmkindigi bar. Bul múmkindikter zań jobasynda kózdelgen mańyzdy jańalyqtyń biri bolyp tabylady. Úkimettik emes uıymdardyń áleýmettik jobalarynyń iske asyrylýy, memlekettik áleýmettik tapsyrys nátıjelerin baǵalaý týraly aqparat halyqqa qoljetimdi bolady.
«Osylaısha, ýákiletti organnyń ınternet resýrsynda memlekettik organdar iske asyratyn memlekettik áleýmettik tapsyrys taqyryptary jarııalanatyn bolady. Al, barlyq memlekettik organnyń ınternet resýrsynda josparlanatyn jáne iske asyrylatyn memlekettik áleýmettik tapsyrys taqyryptary men iske asyrylý qorytyndylarynyń baǵasy jarııalanady», - dep túsindirdi mınıstr.
Budan bólek, memlekettik áleýmettik tapsyrys nátıjelerin baǵalaýdy engizý josparlanýda. Ol halyqqa kórsetilgen qyzmet sapasyna qanaǵattaný deńgeıi men joba tıimdiligin anyqtaýǵa múmkindik beredi. Eki kezeńnen turatyn joba aıaqtalǵannan keıin tikeleı baǵalaý júrgiziletin bolady. Birinshi kezeńde aqparat jınaý, al ekinshi kezeńde alynǵan derekterge taldaý júrgiziledi.
Munymen qosa, úkimettik emes uıymdar kórsetetin memlekettik áleýmettik tapsyrystyń sapasyna, sharttaryna, mazmunyna biryńǵaı talaptar nemese standarttar, sondaı-aq áleýmettik jobalardy baǵalaý krıterıılerin engizý usynylady.
«Standarttardy engizý - úkimettik emes uıymdardyń memlekettik áleýmettik tapsyrys aıasynda kórsetetin qyzmetteriniń sapasyn jáne olardyń kásibı daıarlyq deńgeıin arttyrýǵa múmkindik beredi», - dedi vedomstvo basshysy.
