Memlekettik ákimshilik laýazymdarǵa úmitker jastar sany artyp keledi
«Jastar jylynyń saltanatty ashylýynda Memleket basshysy atap ótkendeı, «jastar - elimizdiń zamanaýı álemde básekege qabilettiliginiń negizgi faktory» bolyp tabylady. Daryndy jastar kez-kelgen qyzmet salasynda jetistikke qol jetkize alady. Bul jeke sektor úshin de, memlekettik qyzmet úshin ózekti. Búgingi kúni 22 myńnan astam jas azamat ózderiniń mansaptyq talǵamdaryn memlekettik qyzmetpen baılanystyrdy. Jastardyń el basqarýdaǵy belsendi rólin ótkizilgen monıtorıng nátıjeleri aıqyn kórsetýde», - dedi ol.
Onyń aıtýynsha, bir jarym myńnan astam jas maman memlekettik qyzmette túrli basqarýshy laýazymdarda jumys isteıdi. Mysaly, 2 370 aýyldyq okrýg ákimderiniń 94-i 29 jasqa deıingi qyzmetshiler. Sonymen qatar jastar arasynda memlekettik qyzmettiń tartymdylyǵy ósip keledi. Ótken jyly memlekettik ákimshilik laýazymdarǵa ornalasýǵa ótken konkýrstarǵa 26 myńnan astam jas úmitker qatysty. Olardyń ishinde 10,5 myńnan astamy túrli memlekettik laýazymdarǵa taǵaıyndaldy.
«Qyzmetshiniń sińirgen eńbegine negizdelgen kezeń-kezeńmen mansaptyq ósý qamtamasyz etilýde. Ótken jyly ishki konkýrstarǵa qatysý arqyly 7 myńǵa jýyq jas qyzmetshi laýazymda joǵarylady. Búgingi kúni, mansaptyq úlgige ótýmen memlekettik qyzmet jeke mamandyq retinde qarastyrylýda. Mysaly, Japonııada memlekettik qyzmet osyǵan uqsas qaǵıdattarǵa negizdelip qurylǵan. Qolyna dıplom alǵan 22 jastaǵy jas maman ózi úshin memlekettik qyzmet pen jeke sektor arasynda sheshýshi tańdaý jasaýy tıis. Budan ári ol tańdaǵan baǵyttan burmaı, ishteı damyp, mansaptyq saty arqyly ret-retimen kóteriledi. «100 naqty qadam» Ult josparyn júzege asyrý aıasynda mundaı úlginiń ımplementatsııasyn júrgizdik», - dedi Jarqyn Tileýkenov.
