Memleketti aldap júrgen kásipkerlerge qarsy arnaıy kýálikter engiziledi
ASTANA. QazAqparat - Búginde elimizge sheteldik taýarlardy alyp kelip, ony ary qaraı «Qazaqstanda jasalǵan» dep satatyn pysyqaılar az emes. Osyndaı áreketterge qarsy ındýstrıaldyq kýálikter júıesi engiziledi, dep xabarlaıdy QazAqparat tilshisi.
«Atameken» UKP basqarma tóraǵasynyń orynbasary Nurjan Áltaevtyń aıtýynsha, otandyq kásipkerler tarapynan osy máselege qatysty aryz-shaǵymdar kóptep túsedi. Sebebi «otandyq kásiporyn» atyn jamylǵan ondaı kásiporyndar ımporttyq taýarǵa «Qazaqstanda jasalǵan» degendi jabystyryp qoıady da, memlekettik jáne kvazımemlekettik satyp alýlarǵa qatysyp júredi. Sóıtip, qyrýar paıdaǵa keneledi. «Dál osy máselege sheshilýge jaqyn. Qazirgi kezde Parlamentte bir zań jobasy jatyr. Onda «ındýstrıaldyq kýálik» degen norma bar. Shyny kerek, atalǵan bastamaǵa qarsy shyqqandar da joq emes. Endi, bizdiń talqylaýlarymyz sál keıinge shegerildi. Sebebi depýtattar demalysqa shyqty. Qyrkúıek aıynan bastap talqylaý jumystaryn taǵy bastaımyz. Menińshe, jyldyń aıaǵyna deıin «ındýstrıaldyq kýálik» degen norma zań júzinde qabyldanady», - deıdi Áltaev.
Aıta keteıik, búgin Astanaǵy «Kórme» ortalyǵynda otandyq taýar óndirýshileriniń «Uly Dala eli» atty kezekti forýmnyń plenarlyq otyrysy ótti. Forým aıasynda otandyq taýarlardyń kórmesi ashyldy. Oǵan 350 kompanııa qatysyp jatyr. Kórme aıasynda sheteldiń iri elektrondy saýda platformalary alǵash ret óz stendterin ashty.
