Memleketterdiń sanktsııalarǵa qosylmaımyz degen ustanymyn qurmetteımiz - Devıd O'Sallıvan

Eýropalyq Odaqtyń sanktsııalar jónindegi arnaıy ókili Devıd O'Sallıvan Astanaǵa arnaıy keldi jáne saparyn qorytyndylap, baspasóz máslıhatyn ótkizdi, dep habarlaıdy Kazinform.

Reseı men Ýkraına arasyndaǵy jaǵdaıdan keıin úlken jetilik memleketteri jáne Eýropa Odaǵy buryn bolmaǵan sanktsııalar paketin engizgen edi. Bul sanktsııalardyń negizgi maqsaty jańa tehnologııalardyń Reseı naryǵyna túsýiniń aldyn alý boldy.

«Meniń rólim – engizilgen sanktsııalarǵa qosylmaýdy uıǵarǵan memleketterge saparlaý. Osy maqsatta eki ret Qazaqstanǵa keldim, erteń Ózbekstanǵa ushamyn, kelesi aptada Úndistan sapary kútip tur. Budan bólek, Armenııa, Qyrǵyzstan, Serbııa, BAÁ, Túrkııa elderine bardym. Bul memleketterdi sanktsııaǵa qosyl dep úgittemeımiz. Olardyń zańdy aýmaǵy sanktsııany aınalyp ótý alańyna aınalmaýy jóninde sóılesemiz», - dep túsindirdi Devıd O'Sallıvan astanalyq tilshilerge.

Óz kezeginde tilshiler sáýir aıyndaǵy sapardan keıin ne ózgergenin, qandaı nátıjeler baıqalǵanyn surady.

«Sáýir aıynda kelgenimde qazaqstandyq tarap óz ustanymyn naqty aıtqan edi. Ásirese, áskerı maqsatta qoldanylatyn taýarlarǵa qarsy sanktsııalardy aınalyp ótý alańyna aınalmaıtynyn, esh tarapty qoldamaıtynyn, neıtraldy ustanymda qalatynyn jetkizdi. Biz Qazaqstan sııaqty basqa da memleketterdiń sanktsııalarǵa qosylmaımyz degen ustanymyn qurmetteımiz. Ol – ár memlekettiń óz sheshimi. Biraq Qazaqstan EO quramyndaǵy memlekettermen saýda qarym-qatynastaryn ornatýǵa, ınvestıtsııa tartýǵa múddeli. Sol sebepti, Qazaqstannyń sanktsııalardy aınalyp ótý jerine aınalýy memleketke de, osy memlekette jumys isteıtin kompanııalarǵa da jaǵymdy emes. Bul – barlyǵymyzǵa da ortaq syn-qater jáne Qazaqstanmen osy máseleni birlese otyryp sheshýge daıyndyǵyn óte joǵary baǵalaımyz», - dedi arnaıy ókil.

Aıta keteıik, Devıd O'Sallıvan bıylǵy sáýir aıynda Qazaqstanǵa kelgen edi.