Memleketterdiń, ásirese iri elderdiń arasyndaǵy senimge selkeý tústi – Memleket basshysy
ASTANA. KAZINFORM – Memleketterdiń, ásirese iri elderdiń arasyndaǵy senimge selkeý tústi. Bul týraly birinshi shaqyrylymdaǵy Quryltaıdyń birinshi sessııasyn ashqan Memleket basshysy Qasym-Jomart Toqaev aıtty.
- Álemdegi oqıǵalar tasyǵan seldeı júıesiz, beıbereket, sıpatqa ıe, aldymyzda ne bolaryn boljaýdyń ózi qıyn. Bul kataklızmderden elder men halyqtardyń eshbiri tys qalǵan joq. Memleketterdiń, ásirese iri elderdiń arasyndaǵy senimge selkeý tústi. Bul BUU men onyń ınstıtýttarynyń qyzmetine zardabyn tıgizip jatyr. BUU Qaýipsizdik Keńesi jahandaǵy jáne aımaqtardaǵy beıbitshilikti, turaqtylyq pen qaýipsizdikti saqtaý mıssııasyn atqara almaı otyr. Osy alasapyranda óńirlik halyqaralyq uıymdar alǵa shyǵyp, olardyń róli aıtarlyqtaı artty, - dedi Qasym-Jomart Toqaev.
Prezıdent álemdik arenada «Orta derjavalar» dep atalatyn memleketter boı kórsete bastaǵanyna nazar aýdartty.
- Qazaqstan da atalǵan sanatqa kiredi. Sonymen qatar turlaýsyz álemde salystyrmaly túrde jańa úderis beleń aldy. Tsıfrlyq tehnologııalar men jasandy ıntellekt qaryshtap damyp jatyr. Bul úderistiń túptiń túbinde qaıda aparyp soǵary beımálim, tipti, qazirgi nátıjelerdiń ózi ekiudaı pikir týdyrady. Keıde muny osy tehnologııany oılap tabatyndar da túsine bermeıdi. Máselen, taıaý keleshekte ıadrolyq qarýdyń ornyn jasandy ıntellekt quraldary almastyrýy múmkin degen boljam aıtyldy. Munyń bári álemniń damýy zańdylyq pen qısynnan ada ekenin kórsetedi. Al onyń zardabyn keleshek urpaq tartady, - dedi Memleket basshysy.
Sessııa barysynda Memleket basshysy Quryltaı bılik júıesin túbegeıli jańǵyrtatynyn aıtty.
