Memleket basshylary Óńirlik ekologııalyq sammıttiń kórme pavılondaryn aralady
ASTANA. KAZINFORM — Prezıdentter men sheteldik delegatsııalardyń basshylary RES 2026 EXPO jasyl jáne ornyqty tehnologııalar halyqaralyq kórmesine bardy. Bul týraly Aqordanyń baspasóz qyzmeti málim etti.
Qazaqstan, Armenııa, Grýzııa, Qyrǵyzstan, Mońǵolııa, Tájikstan Túrikmenstan, Ózbekstan prezıdentterine jáne basqa da mártebeli meımandarǵa Ortalyq Azııa elderi men Ázerbaıjannyń pavılondary tanystyryldy. Munda jasyl energetıka men tabıǵı resýrstardy basqarý salalaryndaǵy ulttyq basymdyqtarǵa den qoıylǵan.
Ekspozıtsııalar ornyqty ekojúıeni saqtaýǵa, qorshaǵan ortany qorǵaý salasynda yntymaqtastyq ornatýǵa, ekologııalyq máselelerdi sheshýdiń tyń tásilderin qarastyrýǵa, Aral mańyn qaıta qalpyna keltirýge úndeıdi.
Memleketter basshylaryna aımaq elderindegi bıznestiń ekojobalary kórsetildi. Atalǵan bastamalar aıasynda kompanııalar jasyl energetıka, ekologııalyq orta qalyptastyrý jáne qaldyqtardy qaıta óńdeý baǵyttarynda óndiristik sheshimder usynady.
Kórme álemniń 30 elinen kelgen 240-tan astam qatysýshy men halyqaralyq seriktesterdiń basyn qosty. 120-dan asa pavılonda ornyqty damý salasyndaǵy ozyq bastamalar kópshilik nazaryna usynyldy.
Memleket pen bıznes arasyndaǵy dıalog alańyna aınalǵan ınvestıtsııalyq forým erekshe mańyzǵa ıe.
Ekspozıtsııada ornyqty damý men ekologııanyń ózekti máseleleri talqylanatyn halyqaralyq kezdesýler, sarapshylar arasyndaǵy pikirtalastar ótip jatyr.
Sondaı-aq ınnovatsııalyq jobalar men jas kásipkerlerdi qoldaýǵa baǵyttalǵan «Jasyl» startaptardyń baıqaýy uıymdastyryldy.
Meımandar aımaq elderi dızaınerleriniń týyndylary men ekologııalyq kıno festıvalin tamashalaı alady.
Eske sala keteıik, Astanada Óńirlik ekologııalyq sammıt ótip jatyr.
