Memleketter arasyndaǵy seriktestiktiń áleýeti zor ekenine senimdimin — Prezıdent
ASTANA. KAZINFORM — Áýejaı zalynda eki el basshylary az-kem áńgimelesti. Memleket basshysy ekijaqty qarym-qatynasty damytý turǵysynan Oman Sultanynyń sapary tarıhı mánge ıe ekenin atap ótti. Bul týraly Aqorda málim etti.
— Oman Sultandyǵy ekonomıkasyn ilgeriletýde zor tabysqa jetken, halyqaralyq arenada óte belsendi ári konstrýktıvti dáneker memleket retinde belgili. Elińizdiń óz aımaǵynda, odan tysqary jerlerde, sonyń ishinde Qazaqstanda da bedeli bıik. Memleketterimiz arasyndaǵy seriktestiktiń áleýeti zor ekenine senimdimin. Aldymyzda yntymaqtastyq aıasyn meılinshe keńeıtý mindeti tur, — dedi Prezıdent.
Oman Sultany Haısam ben Tarıq Ál Saıd qonaqjaılyq tanytqany úshin Qasym-Jomart Toqaevqa alǵys aıtyp, erteńgi kelissózderdiń mazmundy ári jemisti ótetinine senim bildirdi.
Sapar aıasynda joǵary deńgeıde kelissózder júrgizý, birqatar mańyzdy qujatqa qol qoıý, sondaı-aq memleketter basshylarynyń qazaq-oman bıznes forýmyna qatysýy josparlanǵan.
Aıta keteıik, Prezıdent Qasym-Jomart Toqaev Astana áýejaıynda elimizge memlekettik saparmen kelgen Oman Sultany Haısam ben Tarıq Ál Saıdty kútip aldy.
5-6 qazan kúnderi Prezıdent Qasym-Jomart Toqaevtyń shaqyrýymen Qazaqstanǵa Oman Sultany Haısam ben Tarıq Ál Saıd memlekettik saparmen kele jatqanyn jazǵan edik.
Joǵary deńgeıde ótetin kelissózder barysynda taraptar saıası dıalogty nyǵaıtý, sondaı-aq saýda-ekonomıkalyq, ınvestıtsııalyq jáne mádenı-gýmanıtarlyq yntymaqtastyqty keńeıtý perspektıvasyn talqylaıdy dep josparlanǵan.
Sonymen qatar memleketter basshylary qazaq-oman bıznes forýmyna qatysady.
