Memleketten qoldaý alǵan kásipkerlerge monıtorıng biryńǵaı qaǵıdamen júrgiziledi

NUR-SULTAN. QazAqparat – Memlekettik qoldaý alǵan bıznes sýbektilerine monıtorıng júrgizýdiń biryńǵaı qaǵıdasy ázirlenedi. Bul týraly Úkimet otyrysynda QR Ulttyq ekonomıka mınıstri Áset Erǵalıev aıtty, dep habarlaıdy QazAqparat tilshisi.

«Ulttyq ekonomıka mınıstrligi Memleket basshysynyń árbir tapsyrmasyn is júzinde oryndaý sharalaryn ázirledi. Osy jyldyń mamyr aıynyń sońyna deıin salyq, bıýdjet saıasatyn jetildirý boıynsha usynystar engiziledi. Usynystardy ázirleý úshin «Atameken» UKP jáne salyq zańnamasyn jetildirý jónindegi sarapshylar qaýymdastyǵynyń qatysýymen jumys toby qurylady. Nátıjesinde shıkizattyq emes sektorǵa negizdelgen ekonomıkanyń jańa qurylymyn qalyptastyrý úshin salyqtyq sharalar toptamasy daıyndalady. Memlekettik qarjynyń teńgerimdiligin qamtamasyz etý, olardyń ornyqtylyǵyn, sondaı-aq qabyldanatyn bıýdjettik sheshimderdiń tıimdiligin arttyrý boıynsha sharalardy kózdeıtin 2030 jylǵa deıingi jańa bıýdjet saıasaty tujyrymdamasynyń jobasy qalyptastyrylady», - dedi mınıstr.

Sonymen qatar ol shaǵyn jáne orta bıznesti qoldaý jóninde sharalardy ázirleý úshin de «Atameken» UKP jáne sarapshylar qaýymdastyǵynyń qatysýymen jumys toby qurylatyndyǵyn aıtty.

«Bir aı ishinde ázirlengen usynystar ekonomıkalyq ósimdi qalpyna keltirý jónindegi memlekettik komıssııanyń qaraýyna engiziledi. Memlekettik qoldaýdyń tıimdiligin arttyrý maqsatynda memlekettik qoldaý alǵan bıznes sýbektileriniń árqaısysy boıynsha monıtorıngtiń biryńǵaı qaǵıdasy ázirlenedi. Sondaı-aq sýbektilerdiń kóp ólshemdi jáne serpindi monıtorıng júıesi qalyptastyrylady. Bul memlekettik qoldaý sharalarynyńekonomıkalyq jáne áleýmettik qaıtarymyn baǵalaýǵa múmkindik beredi», - dedi Áset Erǵalıev.