Memleketten qoldaý alǵan bank qaryzyn tolyq qaıtarmasa, aıyrmashylyǵyn basqa bankter óteıdi – Zań jobasy

ASTANA. KAZINFORM – Qarjy naryǵyn retteý jáne damytý agenttiginiń tóraıymy Mádına Ábilqasymova jańa zań jobasy boıynsha memleketten qoldaý alǵan banktiń aktsıonerin aýystyrý qalaı iske asatynyn aıtty.

- Buryn bankterge memleket qoldaý kórsetkende túrli tetikter qoldanylatyn. Mysaly, Ulttyq bank jeńildikpen sýbardınatsııalanǵan oblıgatsııalar beretin. Bul bankter arasyndaǵy básekeni ádiletsiz etti. Odan keıin bankterdiń kúızelistegi aktsııalaryn nomınaldy qunymen memleket satyp alatyn. Bul banktiń shyǵynyn memlekettiń moınynan artty. Al bank aktsıoneri ornynda qala beretin. Sonda bankti qıyn jaǵdaıǵa jetkizgen aktsıoner ornyn qalyp, memleketten kóme alatyn. Endi bank tólem qabiletinen aıyrylsa, aktsıoner aýysady. ıAǵnı, aktsıonerdiń kapıtaly tolyq esepten shyǵarylady. Aktsıonerdiń búkil aqshasy, salǵan salymy bank shyǵyndaryn jabýǵa alynady. Odan keıin mindettemeler konvertatsııalanady. Ondaı mindettemelerdiń tizimi bar. ıAǵnı, oblıgatsııalar men shyǵarylǵan boryshtary da shyǵyndy jabýǵa jumsalady. Osylardyń bári qarjy júıesin turaqtandyrýǵa jetpegen jaǵdaıda ǵana memleket aktsıonerlik kapıtalǵa kirý arqyly qoldaý kórsetedi, - dedi ol.

Mádına Ábilqasymova «Memleket qarjylaı qıyndyqqa tap bolǵan bankti qoldamaı turyp, áýeli ony jaba salý tıimdi me?» degen suraqqa baǵa beriletinin aıtady.

- Sheshim qabyldanǵannan keıin ǵana memleket banktiń aktsıoneri bolyp kiredi. Qarjylyq turaqtylyq qalpyna kelgen soń memleket bankti jańa ınvestorǵa satady. Investorǵa bankti satqan kezde memleket aktsıoner retinde salǵan aqsha túgel qaıtpasa, ol aıyrmashylyqty basqa ekinshi deńgeıdegi bankter birlesip jabady. Ol úshin ekinshi deńgeıdegi bankter qor qurýǵa mindetteledi. ıAǵnı, bir bankke qoldaý kórsetýden memleket shyǵyn shekse, qalǵan bankter ony birlesip óteıdi, - dedi agenttik basshysy.

Aıta keteıik, Ulttyq bank pen Qarjy naryǵyn damytý jáne retteý agenttigi Májiliste bankter týraly zań jobasy tanystyrdy.