Memleketten qarjylandyrý alatyn kásiporyndarǵa naqty mindetteme qoıyldy
ASTANA.KAZINFORM — QR Joǵary aýdıtorlyq palatasynyń nusqamasy boıynsha ónerkásip salasyndaǵy jeke kásipkerlik sýbektileriniń úlestik nemese mezonındik qarjylandyrý alý kezinde memleket aldyndaǵy qarsy mindettemeleri bekitildi. Budan buryn qoldaýdyń osy túrleri boıynsha qarsy mindettemeler qoıylmaǵan. Bul týraly palatanyń baspasóz qyzmeti málim etti.
— 2025 jyldyń sońynda Joǵary aýdıtorlyq palata bıznesti memlekettik qoldaý sharalaryna keshendi aýdıt júrgizdi. Onyń qorytyndysy boıynsha Ónerkásip jáne qurylys mınıstrligine mańyzdy retteýshi olqylyqty joıý tapsyryldy. Atap aıtqanda, ónerkásipti yntalandyrý sharalaryn kórsetý kezinde qarsy mindettemelerdi retteıtin qaǵıdalarǵa ózgerister engizý jáne buryn bolmaǵan úlestik jáne mezonındik qarjylandyrýǵa taratý, — delingen habarlamada.
Úlestik qarjylandyrý — bul memleket jobaǵa nemese kompanııaǵa ondaǵy úleske aıyrbas retinde aqsha salatyn mehanızm.
Mezonındik qarjylandyrý — kredıt pen úlestik qatysý belgileri bar ıkemdi gıbrıdtik qural.
Joǵary aýdıtorlyq palatanyń tapsyrmasyn oryndaý maqsatynda bıyl aqpanda QR Ónerkásip jáne qurylys mınıstriniń buıryǵymen qajetti ózgerister engizildi.
Endi ónerkásip bıznesi memlekettik qarjylandyrýdy, sonyń ishinde úlestik nemese mezonındik qatysý nysanynda ala otyryp, ózine memleket aldyndaǵy naqty qarsy mindettemelerdi alýǵa mindetti.
Bul kompanııalardyń jaýapkershiligin kúsheıte otyryp, jumys oryndarynyń sanyn arttyrýǵa, óndiristi damytýǵa jáne eksportty ulǵaıtýǵa múmkindik beredi.
Aıta keteıik, buǵan deıin QR Joǵary aýdıtorlyq palatasynda turaqty túrde óńirlik tekserý komıssııalaryna kandıdattardy irikteý ótip jatqanyn jazdyq.
