Memleketten góri qyzmetterdi ÚEU edáýir jaqsy kórsete alady

ASTANA. QazAqparat - Eger memlekettik qyzmetterdiń bir bóligi azamattyq sektorǵa ótetin bolsa, úkimettik emes uıymdar memleketke qaraǵanda qyzmetterdi edáýir jaqsy kórsete alady. Bul týraly búgin «Qazaqstannyń azamattyq alıansy» uıymynyń dırektory Ildar Katenov málim etti.

«Úkimettik emes uıymdar memleketke qaraǵanda qyzmetterdi jaqsy kórsete alady. Kóbi azamattyq uıymdarda jetkilikti bilim men biliktilik, múmkindikter joq dep esepteıdi. Alaıda úkimettik emes uıymdarda memlekettik qyzmette kóp jyldar istegen, jeke sektorda kóp jyldyq ótili bar bilikti de kásibı mamandar jeterlik. Men tipti olar memlekettik qyzmettegi áriptesterinen bir bas joǵary der edim. Sebebi olar xalyqpen jumys isteýdi biledi. Azamattardyń muń-muqtajyn ishten kórgen kásibı mamandar», - deıdi ol.

Onyń aıtýynsha, úkimettik emes uıymdardyń sapasyna baǵa dempıngi nuqsan keltirýi yqtımal.

«Áleýmettik tapsyrys túsken kezde, ÚEU-dar bir-birimen básekelesip, baǵany qatty túsirip jiberýi múmkin. Bul óz kezeginde qyzmettiń sapasyna qatty áser etetini sózsiz», - deıdi ol.

I. Katenovtiń sózi boıynsha, memlekettik qyzmetterdi azamattyq sektorǵa berý boıynsha jumystar endi ǵana talqylanýda jáne onyń naqty qashan júzege asyrylatyny belgisiz. Biraq kelesi jyly osy máselege qatysty arnaıy qurylǵan komıssııa men memlekettik organdar Parlamentke jańa zań jobasyn engizbek. «Sol kezde osy jumystardyń merzimderi, tetikteri, sondaı-aq qandaı ózgerister oryn alý kerektigi naqtylanady», - dep túıdi sózin I. Katenov.