Memleketten azamattarǵa quqyqtyq kómek kórsetýge bólinetin qarajat medıatorlarǵa da berilýi tıis - Baqytjan Ábdiraıym
«Qazaqta 15 ǵasyrdan bastap daýlardyń bárin bıler sheshken. Bıler qalaı sheshken? Bir ǵana jolmen - bitimgerlik arqyly sheship otyrǵan. Eki jaqty ortaq mámilege uıystyrǵan. Qazbek, Áıteke, Tóle bıler týyndaǵan daýdy bir aýyz sózben sheship, taraptardy ortaq mámilege ákelgen. Mine, osyny qazirgi tańda qaıta jańǵyrtý qajettiligi týyndady. Biz búgin dóńgelek ústel otyrysymyzda osy máseleni talqyladyq. Sebebi, qazirgi qoǵamda bolyp jatqan ózgerister, Elbasynyń Joldaýynda kórsetilgen basymdyq - munyń barlyǵy eń aldymen qoǵamdyq kelisimge ákeledi», - dedi ol «Konstıtýtsııalyq reforma jáne qoǵamdyq kelisim» atty respýblıkalyq keńesten keıin BAQ ókilderine bergen suhbatynda.
Máselen, onyń aıtýynsha, bir adam sotqa barǵannan keıin ózimimen sottasqan adamymen ómir boıy qas bolýy múmkin. Al táýelsiz medıator olardyń daýyn sheship berse, olardyń arasynda ókpe-renish qalmaıdy.
Sondaı-aq Respýblıkalyq medıatsııa keńesiniń tóraǵasy memleket tarabynan azamattarǵa quqyqtyq kómek kórsetý úshin aqsha bólinetindigin atap ótti.
«Osy qarjyny nege medıatorlarǵa da bermeske. Týyndaǵan daýlardy olar da sheshýde. Máselen, memleket tarabynan azamattarǵa quqyqtyq kómekke bólinetin qarjynyń 80 paıyzdan astamy qaralatyn qylmystyq isterge jumsalady. Ony kóbine kezekshi advokattar alady. Olar muny kásip qylyp alǵan, bólingen aqshalar solardyń qaltasyna túsedi. Negizgi qajet dúnıe - daý týmaı turyp sheshý desek, onda medıatorlardy da sol tizimge engizip, memleketten bólinetin qarjydan azdap bolsyn jalaqy alýyna jaǵdaı jasaǵan jón. Bul rette memleket birneshe ret utysqa shyǵady. Aldymen daý týmaı turyp sheshiledi. Ekinshiden, olar sotqa barmaǵandyqtan sot aqshasy shyǵyn bolmaıdy. Úshinshiden adamdar arasyndaǵy ókpe-renish sheshiledi. Qazir ákimshilikterdiń, Assambleıa janynda medıatorlar kabıneti bar», - dep túıindedi sózin Ábdiraıym.
