Memleketten 153 mln teńge jymqyrǵan bas esepshi 5 jylǵa sottaldy
QYZYLORDA. QazAqparat - Qyzylorda oblystyq medıtsına ortalyǵynyń bas esepshisi Oksana Ońǵarova QR Qylmystyq Kodeksiniń 176-baby 4 «b» bólimimen (1997 jylǵy redaktsııa) 5 jylǵa sottaldy.
Sonymen qatar onyń múlki tárkilenip, qarjyǵa ıelik etý salasyndaǵy qyzmetti 5 jylǵa deıin atqarýǵa tyıym salyndy. Al onyń sybaılasy Gúlnár Ótebalıeva QR QK 28-baby 5-bólimimen, 176-baby 4-bólimimen (1997 jylǵy redaktsııa) 7 jylǵa bas bostandyǵynan aıyrylyp, múlki tárkilendi. Oǵan da 3 jylǵa deıin qarjyǵa ıelik etý salasyndaǵy qyzmetti atqarýǵa tyıym salyndy. Ol jazasyn jalpy rejimdegi kolonııada óteıtin bolady, dep habarlady QazAqparat tilshisi.
Tergeý kezinde O. Ońǵarova ózine senip berilgen bótenniń múlkin talan-tarajǵa salý nıetimen týǵan ápkesi G.Ótebalıevamen birlese otyryp memleket bıýdjetinen bólingen qarjyny asa iri mólsherde jymqyrǵany anyqtaldy.
Ol ózara jasalǵan kelisim men aıǵaqtaıtyn qujattardyń joqtyǵyna qaramastan 2011-2012 jyldar aralyǵynda «Alıans bank» AQ fılıalyndaǵy «Internet Bankıng» elektrondy baǵdarlamasy arqyly OMO esepshotynan «Ýmbetbaeva A.» JK esepshotyna jalpy somasy 20 082 300 teńge aýdarǵan. Al 2012-2014 jyldary dál osyndaı jolmen «Barahatova G.» JK esepshotyna 36 697 600, «Iskakov F.» JK shotyna 37 625 000, «Ýtebalıeva D.» JK esepshotyna 14 390 000 teńge jibergen.
Al G.Ótebalıeva bolsa óz tanystary A.Úmbetbaevany, G.Barahatovany, F.Ysqaqovty jáne M.Úmbetbaevty jeke kásipker retinde tirkep, ekinshi deńgeıli bankterden olardyń esep shottaryn ashqan. Solardyń senimhaty negizinde esepshotqa túsken mıllıondardy qolma-qol aqshaǵa aınaldyryp otyrǵan.
2015-2016 jyldary da O.Ońǵarova «Forte Bank» AQ fılıalynyń «Internet Bankıng» baǵdarlamasy arqyly úsh esepshotqa jalpy kólemi 44 294 577 teńgeni aýdaryp jibergen.
O. Ońǵarova sotta óz aıybyn tolyq moıyndap, aqshany óz keregine jumsaǵanyn aıtyp berdi.
Jalpy onyń bul áreketinen memleketke 153 089 177 teńge zalal kelgeni anyqtaldy.
«Qyzylorda oblysynyń densaýlyq saqtaý» MM tarapynan O. Ońǵarova men G. Ótebalıevadan memleket paıdasyna 107 294 600 teńge óndirip alý jónindegi talap aryzy tolyq qanaǵattandyryldy.
Qyzylordadaǵy №2 sottyń 2017 jylǵy 13 naýryzdaǵy úkimi zańdy kúshine endi.
