Memleketke jemqorlardan 111 mlrd teńge zalal kelgen

ASTANA. KAZINFORM — Jyl basynan beri jemqorlyqtan bıýdjetke 111 mlrd teńge zalal kelgen. Bul byltyrmen salystyrǵanda 2 ese kóp. Shyǵynnyń 96 mıllıardy qyzmetin asyra paıdalǵandardan kelse, 2 mıllıard alaıaqtyq jolmen jymqyrylǵan. Qazir urlanǵan qarjynyń 5 jarym mıllıard teńgeden astamy óz erkimen qaıtaryldy. Bul týraly Jibek Joly arnasynyń jańalyqtarynda aıtyldy.

Keıingi 3,5 jylda jemqorlar jol qurylysyna bólingen qarjynyń 9 mıllıard teńgesin qaltaǵa basqan. Tek byltyr 5 óńirdegi smetalyq qujatta 5 mıllıard teńge artyq kórsetilgen. Saldarynan joldardyń sapasy syn kótermeıdi. Jańa asfalttardyń ózi bir jyl ótpeı úgitilip jatyr. Sondyqtan Sybaılas jemqorlyqqa qarsy is-qımyl agenttigi jol qurylysyna qatysty monıtorıngti kúsheıtti. Sheteldik tájirıbege súıenip, jaǵdaıdy retteýdi kózdep otyr.

— Biz qazir Memleket basshysynyń tapsyrmasymen jol qurylysy kezindegi jemqorlyqty qarastyryp jatyrmyz. Bul rette Gongongtyń tájirıbesin qoldanbaqpyz. Olar jobalyq-smetalyq qujattamany tekserýdiń, birde bir shyǵyn bolmaýynyń tyń ádisin tapqan, - dedi QR Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı. 

Jomqorlyq elimizdiń aýyl sharýashylyǵy, densaýlyq saqtaý, bilim salalarynda da beleń alyp tur. Agenttiktiń málimetinshe, jyl basynan beri 800 den astam qylmystyq is qozǵalǵan. 600-deı adam ustaldy.

— Sybaılas jemqorlyqpen kúresýdiń jalǵyz joly — zańsyz baıyǵan memlekettik qyzmetkerlerdi qylmystyq jaýapkershilikke tartý. Qazir olardaǵy múliktiń qaıdan kelgenin surasań jeke basyna qatysty máselege qol suqtyń dep aıyptalasyń. Sondyqtan zańdy ózgertý kerek, - deıdi sarapshy Dıdar Smaǵulov.

Qazir tıisti zań jobasy Májiliste qaralyp jatyr. Jańa normaǵa jemqorlardyń jalpyǵa birdeı reestiri de engizilýi múmkin.

— Sybaılas jemqorlyq órship tur. Memlekettik qyzmetkerler jumysqa óz týystaryn ǵana alady. Bul turǵyda qylmystyq jaýapkershilikti kúsheıtý asa mańyzdy, - deıdi QR Parlamenti Májilisiniń depýtaty Marat Báshimov. 

Sarapshylar jemqorlyqty túbegeıli joımasaq ta, azaıtýdyń joly — ashyqtyq deıdi. Biraq jemqorlardyń ózi eldiń damýyna kedergi jasap otyrǵanyn túısinbeıinshe jaza da, kúres te máseleni sheshpeıtini anyq… 

Buǵan deıin habarlanǵandaı,  Premer-Mınıstr Oljas Bektenov Senat depýtattarynyń kvazımemlekettik sektordaǵy sybaılas jemqorlyqqa qarsy komplaens-qyzmetterdi aýtsorsıngke berý múmkindigine qatysty saýalyna jaýap bergen bolatyn.