Memleketke zańsyz shyǵarylǵan 1,3 trln teńge kólemindegi aktıvter qaıtaryldy
ASTANA. KAZINFORM — Bas Prokýror prokýratýra organdarynyń ardagerlerimen «Zań men Tártip» qaǵıdatyn iske asyrý jáne jastardy tárbıeleý máselelerin talqylady.
Saltanatty kezdesý prokýratýra organdarynyń ár býyn ókilderin biriktirip, «Zań men Tártip» ıdeologııasyn odan ári ilgeriletý, zańdylyqty nyǵaıtý, jastarǵa patrıottyq tárbıe berý jáne urpaqtar sabaqtastyǵyn saqtaý máselelerin talqylaýǵa arnaldy.
Іs-sharany ashqan Bas Prokýror Berik Asylov prokýratýra organdary Memleket basshysynyń Ádiletti Qazaqstan qurý jónindegi baǵytyn dáıekti túrde iske asyryp kele jatqanyn atap ótti. Bul baǵytta zań ústemdigi, azamattardyń quqyqtaryn qorǵaý, qoǵamdyq dıalogty damytý jáne «Zań men Tártip» qaǵıdaty memlekettik saıasattyń negizgi baǵdarlary bolyp tabylady.
Ol bul qundylyqtardyń jańa Konstıtýtsııada bekitilgenin jáne Prezıdent olardy memlekettiń ornyqty damýy men azamattardyń memleketke degen senimin nyǵaıtýdyń negizi retinde aıqyndaǵanyn aıtty.
Kezdesýde Memleket basshysynyń prokýratýra organdarynyń aldyna qoıǵan strategııalyq mindetterdiń iske asyrylýyna erekshe nazar aýdaryldy.
Búginde memleketke zańsyz shyǵarylǵan 1,3 trıllıon teńge kólemindegi aktıvter qaıtaryldy. Osy qarajat esebinen 350 áleýmettik nysannyń qurylysy aıaqtaldy. Onyń ishinde 179 sýmen jabdyqtaý nysany, 159 densaýlyq saqtaý mekemesi, 6 bilim berý nysany, 3 sport nysany, 2 ınjenerlik ınfraqurylymnyń nysany jáne 1 kólik ınfra qurylymynyń nysany bar.
— Qazynaǵa qaıtarylǵan árbir teńge — naqty adamdar sezinetin ádildiktiń qalpyna kelýi. Bul — jańa mektepterde bilim alyp jatqan balalar, qaýipsiz ári jaıly jaǵdaıda ómir súrip jatqan otbasylar, — dep atap ótti Berik Asylov.
Sonymen qatar prokýrorlar jańa óndiristerdi iske qosýǵa, jumys oryndaryn ashýǵa jáne ekonomıkalyq ósýdiń jańa núktelerin qalyptastyrýǵa baǵyttalǵan 3 myńnan astam ınvestıtsııalyq jobany súıemeldeýde. Tek bıyldyń ózinde olardyń úılestirýimen 42 jańa óndiris iske qosylyp, shamamen 3 myń jumys orny quryldy.
Quqyqtyq mádenıetti qalyptastyrý máselesine toqtalǵan qadaǵalaý organynyń basshysy prokýratýra organdary ardagerleriniń jas urpaqty tárbıeleýdegi jáne «Zań men Tártip» ıdeologııasyn ilgeriletýdegi mańyzdy rólin atap ótti.
Prokýratýranyń bastamasymen jáne Memleket basshysynyń qoldaýymen mektepter men kolledjderde «Zań men Tártip» páni engizildi. Talǵar aýdanyndaǵy birqatar orta bilim berý uıymdarynda prokýratýra men polıtsııa ardagerleriniń qatysýymen 8 myńnan astam oqýshyny qamtyǵan pılottyq joba jasóspirimder qylmysynyń (7-den 0-ge deıin) jáne ákimshilik quqyqbuzýshylyqtardyń (135-ten 89-ǵa deıin) tómendegenin kórsetti.
Búginde respýblıka boıynsha quqyq qorǵaý jáne arnaýly organdardyń 317 ardageri jastarmen kezdesýler men dárister ótkizip, atalǵan qaǵıdatty, sondaı-aq «Adal azamat» pen «Taza Qazaqstan» bastamalaryn túsindirip, Konstıtýtsııaǵa, zańǵa jáne patrıottyq qundylyqtarǵa qurmetti qalyptastyrýǵa úles qosýda.
Berik Asylov Memleket basshysynyń: otanshyldyq degenimiz — árıne, Otanǵa degen súıispenshilik qana emes, sonymen qatar azamattyq jaýapkershilik pen ózelińe paıdaly bolýǵa umtylys degen sózin eske saldy.
Bas Prokýror ardagerlerge arnap sóılegen sózinde olardy tálimgerlik pen quqyqtyq aǵartý jumystaryna, zańdylyq pen quqyqtyq tártipti nyǵaıtý isine belsendi qatysýdy jalǵastyrýǵa shaqyrdy. Sondaı-aq Bas prokýratýra janynan zańdylyqty nyǵaıtý jáne jas urpaqty tárbıeleý máselelerin turaqty túrde talqylaıtyn alań qurýdy usyndy.
Kezdesýdi qorytyndylaı kele, Berik Asylov ardagerlerdi 13 shildede atalyp ótken Prokýratýra organdary ardagerleri kúnimen quttyqtady. Bul kúndi prokýratýra organdarynyń qurmetti demalysqa shyqqan burynǵy qyzmetkerleriniń merekesi retinde ardagerler qaýymdastyǵy aıqyndaǵan. Zańǵa adal ári minsiz qyzmeti jáne elimizdiń quqyqtyq júıesin damytýǵa qosqan ólsheýsiz úlesi úshin ardagerlerge alǵysyn bildirdi.
Saltanatty jaǵdaıda olarǵa Bas Prokýrordyń vedomstvolyq nagradalary, sondaı-aq Prokýratýra organdary ardagerleri qoǵamdyq birlestikteriniń respýblıkalyq odaǵynyń medaldary tabys etildi.
