Memleketke quny 26,7 mlrd teńge bolatyn biregeı «Teke» kóli qaıtaryldy
ASTANA. KAZINFORM – 2020 jyly as tuzyn óndeýge arnalǵan kelisimshart sheńberinde jergilikti atqarýshy organdar jer qoınaýyn paıdalanýshyǵa jalpy aýdany 21,5 myń ga Teke kólin bergeni anyqtaldy.
— Degenmen, 2022 jyly jer qoınaýyn paıdalanýǵa arnalǵan kelisimsharttyń toqtatylýyna qaramastan, ýákiletti organ jer kodeksiniń talaptaryna qaıshy, eki jyldan astam ýaqyt boıy sotqa deıingi tártippen shartty birjaqty buzý jóninde sharalar qabyldamaǵan, sý qorynyń jeri maqsatsyz paıdalanylǵan. Budan basqa, «Jer qoınaýy jáne jer qoınaýyn paıdalaný týraly» kodekstiń talaptaryna qaramastan, sharýashylyq júrgizýshi sýbektisi quzyretti organnyń resmı saıtynda jer qoınaýyn paıdalanýshylardyń tiziliminen alynbaǵan, — delingen Soltústik Qazaqstan oblysynyń prokýratýrasy taratqan habarlamada.
Mamandandyrylǵan tabıǵat qorǵaý prokýrorynyń qabyldanǵan sharalarymen jer ýchaskesin jaldaý sharty sotqa deıingi tártippen birjaqty buzyldy.
Kadastrlyq quny 26,7 mlrd teńge bolatyn jalpy aýdany 21,5 myń ga aşy — tuzdy Teke kóli memlekettik menshikke qaıtaryldy.
— Quzyretti organnyń ınternet-resýrstaryndaǵy málimetter sáıkestendirildi, kináli laýazymdy tulǵalar tártiptik jaýapkershilikke tartyldy. Memleket múddelerin qorǵaý máseleleri SQO prokýratýrasynyń erekshe baqylaýynda, — delingen habarlamada.
Aıta ketelik úsh jylda 12,1 mln gektar jer memleketke qaıtarylǵan edi.