Memleketke qaıtarylǵan jer ıeleriniń narazylyǵy ákimdik pen prokýratýranyń durys jumys jasamaýynan oryn alyp otyr - Astana soty
ASTANA. QazAqparat - Memleket qajetine alynǵan jer ıeleriniń narazylyǵy jergilikti atqarýshy organdardyń, baǵalaýshylardyń jáne prokýrorlyq baqylaýdyń durys jumys jasamaýy saldarynan órbip otyr.
Bul týraly búgin Astana qalalyq sotynda ótken «Jer telimderin memleket qajetine qaıtarý kezinde ótemaqy mólsherin belgileý máseleleri» atty dóńgelek ústel otyrysynda Astana qalalyq sotynyń sýdıasy Qarlyǵash Tatkeeva aıtty.
Onyń aıtýynsha, ótemaqysyn tóleı otyryp, jer telimderin memleket qajetine qaıtaryp alý sharalary jyl sanap artyp keledi. Alaıda osymen qatar jer ıeleriniń ótemaqy mólsheriniń mardymsyzdyǵyna baılanysty narazylyqtary da kóbeıe túsýde.
«Osyǵan baılanysty jer telimderiniń ıeleri Astana qalalyq sotyna narazylyq bildirip, basqa ınstantsııalardaǵy sottarǵa shaǵymdanýda. Astana qalalyq soty munymen kelise almaıdy», - dedi Q. Tatkeeva.
«Mundaı isterdi júrgizýdiń saraptamasy kórsetkendeı, jer telimin memleket qajettiligine qaıtarý sharalary kezinde paıda bolatyn máselelerdiń negizgi sebebi keıbir jaǵdaılarda jergilikti atqarýshy organdardyń jer telimderin qaıtaryp alýdy retteıtin zańnamany durys qoldanbaýy, sondaı-aq, memlekettik nemese jeke baǵalaýshylardyń baǵalaý standarttarynan aýytqýy saldarynan bolyp otyr. Sonymen qatar, osy saladaǵy zańdylyqtyń saqtalýyn qadaǵalaýdaǵy prokýrorlyq baqylaýdyń joqtyǵyn da atap ótýge bolady», - dedi sýdıa.
