Memleketke qaıtarylǵan aktıvterdi jınaqtaý qory qurylady

ASTANA. QazAqparat – Premer-Mınıstrdiń orynbasary – Qarjy mınıstri Erulan Jamaýbaev zańsyz shyǵarylǵan aktıvterdi memleketke qaıtarý týraly zań jobasyna qatysty pikir bildirdi, dep habarlaıdy QazAqparat tilshisi.

Onyń aıtýynsha, Bas prokýratýranyń qurylymynda zańsyz shyǵarylǵan aktıvterdi qaıtarý jónindegi jeke vedomstvo qurylady.

«Ekinshiden, tıisti qor qurylady. Bul qorda jeke shot bolýy múmkin nemese jeke kásiporyn bolýy múmkin. Qaıtarylýy tıis múlikti basqarý kerek, ony qandaı da bir esepshotqa aýdarý qajet. Bul jumystardy atqarýǵa belgili bir qurylym kerek. Bul qurylym aýqymdy bolmaıdy, onyń quramynda shamamen 10 adam bolýy múmkin», - dedi Qarjy mınıstri Májiliste tilshiler suraǵyna jaýap bere otyryp.

«Bul másele aldaǵy ýaqytta Parlamentte jan-jaqty qaralady. Qujat endi ǵana Májilistiń qaraýyna enip otyr», - dedi E. Jamaýbaev.

Budan buryn habarlanǵandaı, jaqyn arada Prlament Májilisi zańsyz shyǵarylǵan aktıvterdi memleketke qaıtarý týraly zań jobasy men birneshe ilespe qujatty talqylaıdy.

Zańsyz satyp alynǵan aktıvterdi memleketke qaıtarý týraly» zań jobasy jáne ilespe zań jobalary qoldanysqa engizilgennen keıin, Bas prokýratýranyń qurylymynda zańsyz shyǵarylǵan aktıvterdi qaıtarý jónindegi jeke vedomstvo qurylady. Ol osy saladaǵy ýákiletti organnyń fýnktsııalaryn oryndaıdy. Budan basqa, memleketke qaıtarylǵan aktıvterdi jınaqtaý ári basqarý máseleleri boıynsha arnaıy memlekettik qor jáne basqarýshy kompanııa qurylady. Bul qaıtarylǵan aktıvterdi Qazaqstan halqynyń ál-aýqatyn arttyrýǵa baǵyttalǵan áleýmettik jáne ekonomıkalyq jobalardy qarjylandyrýǵa baǵyttaýǵa múmkindik beredi.