Memleketke qaıtarylyp jatqan QBTÝ stýdentteriniń taǵdyry ne bolady — mınıstr jaýaby

ASTANA. KAZINFORM — Ǵylym jáne joǵary bilim mınıstri Saıasat Nurbek Úkimet otyrysynan keıin ótken baspasóz máslıhatynda memleketke qaıtarylyp jatqan Qazaqstan-Brıtan tehnıkalyq ýnıversıtetiniń keleshegi týraly pikir bildirdi.

— QBTÝ-dy memleketke qaıtarý protsesi júrip jatqanyn bilemiz. Quryltaıshysy aýyssa, oqytýshy-professorlyq quramy, olardyń aılyǵy qazirgi deńgeıde saqtala ma? Qazirgi stýdentteri dıplomyn eshqandaı kedergisiz alyp shyǵa ma?, — dep surady jýrnalıst.

Saıasat Nurbek sot sheshimi shyqqansha qandaı da bir tolyqqandy málimet berý qıyn ekenin eskertti.

— Qazir ol ýnıversıtet jabylady eken, basqalaı bolady eken dep aıtýǵa bolmaıdy. QBTÝ ıesi aýyssa, tolyqqandy ózgeredi degen áńgime joq. Ýnıversıtettiń basshylyǵymen tikeleı baılanystamyz. Jumys jalǵasyp jatyr, dárister júrip jatyr. Eshqandaı bóget joq. Endi sottyń sheshimin kútýimiz kerek. Qazirgi tańda tolyqqandy kommentarıı bere almaımyn. Sottyń naqty sheshimi shyqsyn. Sizge naqty aıtaıyn, bul ýnıversıtet bizge berile me, álde basqa sheshim bola, áli sheshilgen joq. Sot sheshimi shyqqannan keıin tolyqqandy kommentarıı berýge daıynbyz, — dedi mınıstr.

Eske salsaq, ótken aptada Qazaqstan-Brıtan tehnıkalyq ýnıversıteti memleketke qaıtarylǵany málim bolǵan edi.