Memleketke qaıtarylǵan jerler jaıylym tapshylyǵyn sheshken joq — Senat depýtaty
ASTANA. KAZINFORM — Senator Sáken Arýbaev depýtattyq saýalynda birqatar óńirde jaıylym áli de tapshy bolyp otyrǵanyn másele etip kóterdi.
Senator ıgerilmeı jatqan jáne zańsyz berilgen jerlerdi memleket menshigine qaıtarylyp jatqanyna qaramastan, jaıylym máselesi áli de ózekti. Saldarynan mal sharýashylyǵynyń damýy tejelip otyr.
— Búgingi tańda memleket menshigine 14,3 mln gektar jer qaıtarylǵan. Onyń 12,7 mln gektary — jaıylymdyq alqaptar. Onyń ishinde 8,5 mln gektary aýyl sharýashylyǵy aınalymyna qaıta qosyldy. Soǵan qaramastan, birqatar óńirde jaıylym tapshylyǵy áli de qaýipti deńgeıde qalyp otyr. Mańǵystaý oblysynda jaıylym tapshylyǵy 2,3 mln gektar, Túrkistan oblysynda 531 myń gektardan astam, Almaty oblysynda — 758,8 myń gektar, Qyzylorda oblysynda — 403,2 myń gektar, Qostanaı oblysynda — 379 myń gektar. Qaıtarylǵan jaıylymdyq alqaptardyń bir bóligi eldi mekenderden óte alys jatyr, sý kózderimen jáne ınfraqurylymmen qamtamasyz etilmegen nemese tabıǵı-klımattyq jaǵdaılardy eskergende tolyqqandy paıdalanýǵa jaramsyz, — dep atap ótti Sáken Arýbaev.
Sondaı-aq, ol Jambyl oblysynda aýyl sharýashylyǵy jeri memlekettik orman qoryna ótip ketkendikten turǵyndar mal jaıatyn oryn tappaı qalǵanyn aıtty.
— Bul ýchaskelerdiń kóbi is júzinde orman ósirý fýnktsııasyn atqarmaıdy. Osyǵan baılanysty alys jaıylymdyq alqaptardy túgendeý jáne qajetti ınfraqurylymdy damytý boıynsha arnaıy memlekettik baǵdarlama ázirleýdi usynamyz. Sondaı-aq jaıylymdardyń biryńǵaı tsıfrlyq bazasyn qalyptastyra otyryp, keshendi ǵylymı jáne geobotanıkalyq zertteýler júrgizý qajet. Resmı túrde memlekettik orman qoryna jatatyn, biraq mal sharýashylyǵyna jaramdy jerlerdi sharýashylyq aınalymyna qosýdyń quqyqtyq tetikterin jasaý kerek, — dedi depýtat.
Buǵan deıin bıyl shalǵaı jaıylymdardaǵy mal sharýashylyǵyna mamandanǵan 200 sharýashylyq qurylatynyn jazǵan edik.