Memleketke qaıtarylǵan Almaty ıppodromynda ne ózgeredi
ALMATY. KAZINFORM — Bıyl tamyz aıynda Almaty ıppodromy qala menshigine qaıtarylǵany belgili boldy.
Almaty ákimdigi qalanyń 2040 jylǵa deıingi Bas josparynda ıppodrom aýmaǵy tıisti fýnktsıonaldyq aımaqqa bekitilgenin habarlady, ıaǵnı, qalalyq ıppodrom tarıhı jáne sporttyq maqsattaǵy birtutas nysan retinde saqtalady.
Kazinform agenttigi qala basshylyǵyna júginip, memleketke qaıtarylǵan sporttyq nysannyń bolashaǵyna qatysty aldaǵy josparlaryn naqtylady.
Ippodrom tarıhy
Almaty ıppodromy 1930 jyly qurylǵan jáne Qazaqstan men Ortalyq Azııadaǵy jylqy sharýashylyǵy men at sportyna arnalǵan baıyrǵy nysandardyń biri bolyp esepteledi. Onyń aýmaǵy — 39,1 gektar. Tarıhı turǵydan ıppodrom shamamen 3 myń kórermenge jáne 300-ge jýyq jylqy ustaýǵa eseptelgen. Onda kúrdeli jóndeý jumystary 1965 jáne 1985 jyldary júrgizilgen.
1990 jyldardaǵy jekeshelendirý nátıjesinde ıppodrom memlekettik menshikten shyǵarylǵan. Al 2001 jyly «Ippodrom» AQ bankrot bolǵannan keıin múliktik keshen jeke qurylymdarǵa satylyp ketken edi. 2026 jyly Memleket basshysynyń tapsyrmasyna sáıkes, Almaty ıppodromy qalanyń kommýnaldyq menshigine qaıtaryldy.
Aldaǵy jospar
Agenttik saýalyna jaýap bergen Almaty qalasynyń sport basqarmasy qazirgi ýaqytta nysan basqarma teńgeriminde turǵanyn atap ótti.
Vedomstvo málimetine sáıkes, búginde ıppodrom ınfraqurylymynyń tehnıkalyq jaı-kúıin baǵalaý jumystary júrgizilip jatyr. Tehnıkalyq tekserý nátıjeleri boıynsha jobalaý-smetalyq qujattama ázirlenbek.
— Atalǵan qujattama bekitilgennen keıin nysannyń tehnıkalyq jaǵdaıyn jaqsartýǵa jáne ony odan ári paıdalanýǵa qajetti jaǵdaılar jasaýǵa baǵyttalǵan jóndeý-qalpyna keltirý jumystaryn júrgizý josparlanyp otyr. Jumystardyń naqty kólemi men iske asyrý merzimderi jobalaý-smetalyq qujattama ázirlengennen keıin aıqyndalady, — dep habarlady sport basqarmasynan.
Sonymen qatar vedomstvo ókilderi búginde Almaty ıppodromy ulttyq jáne at sporty túrlerin damytý, sportshylardyń oqý-jattyǵý protsesin uıymdastyrý jáne sporttyq jarystar ótkizý maqsatynda paıdalanylyp jatqanyn málimdedi. Atap aıtqanda: ıppodrom aýmaǵynda kókpar, teńge ilý, sadaq atý, báıge jáne basqa da ulttyq sport túrleri boıynsha sportshylardyń oqý-jattyǵý jumystary júrgizilip keledi.
— Aldaǵy ýaqytta da ıppodromdy ulttyq sport túrleri boıynsha sportshylardy daıarlaý, sondaı-aq qalalyq, respýblıkalyq jáne halyqaralyq deńgeıdegi jarystardy ótkizý maqsatynda paıdalaný josparlanǵan, — delingen jaýapta.
«Tulpar» kesheniniń jaı-kúıi
Byltyr Almaty ıppodromynyń janynda ornalasqan «Tulpar» at sporty kesheni memleketke qaıtaryldy. Jetisý aýdandyq prokýratýrasy 2019 jyldyń 5 naýryzyndaǵy Qarjy mınıstrliginiń Memlekettik múlik jáne jekeshelendirý komıteti men «Nomad’s Land» JShS arasyndaǵy satyp alý-satý shartyn jaramsyz dep taný týraly sotqa talap aryz bergen. Sot sheshimimen atalǵan mámile jaramsyz dep tanylyp, nátıjesinde «Tulpar» kesheni qala qaramaǵyna ótti.
Keıin Almaty qalasynyń sport basqarmasy nysan Ulttyq jáne at sporty sport klýbynyń jedel basqarýyna berilgenin aıtqan bolatyn.
Kazinform agenttigi sol ýaqyttan beri nysanda qandaı ózgeris bolǵanyn surap, jaýapty vedomstvoǵa qaıta júgindi. Alaıda osy jolǵy jaýabynda sport basqarmasy «Tulpar» kesheni Ulttyq jáne at sporty túrleri boıynsha qalalyq sport klýbynyń jedel basqarýyna áli berilmegenin habarlady.
Vedomstvo jaýabyna sáıkes, Almaty qalasy ákimdiginiń 2025 jylǵy 19 tamyzdaǵy № 3/583 qaýlysy boıynsha keshen nysanaly maqsaty boıynsha paıdalaný úshin Ulttyq jáne at sporty túrleri boıynsha sport klýbynyń basqarýyna bekitilgen. Alaıda nysannyń bank kepilde bolýyna baılanysty oǵan qatysty múliktik quqyqtardy memlekettik tirkeý rásimi aıaqtalmaǵan.
— Osyǵan baılanysty Almaty qalasy boıynsha Memlekettik múlik jáne jekeshelendirý departamenti kepildi toqtatý týraly sotqa talap aryz berip, ol sot sheshimimen qanaǵattandyryldy. Atalǵan sot sheshiminiń 2026 jylǵy 24 qarashada zańdy kúshine enýi kútiledi. Sot sheshimi zańdy kúshine engennen keıin kepildik aýyrtpalyqty alyp tastaý jáne múliktik quqyqtardy memlekettik tirkeý rásimderi belgilengen tártippen júrgiziletin bolady, — dep naqtylady basqarma ókilderi.
Sondaı-aq nysanǵa qatysty quqyqtyq rásimder tolyq aıaqtalǵannan keıin ony ulttyq jáne at sporty túrlerin damytý, sportshylardyń oqý-jattyǵý protsesin uıymdastyrý, sporttyq jarystar ótkizý maqsatynda paıdalanylatyny atap ótildi.
Eske salaıyq, Almaty oblysynda «Barys» avtobazarynyń jeri memleketke qaıtaryldy.