Memleketke qaıtarylǵan «Almaty arena» men «Halyq arenada» qandaı ózgeris bolady
ALMATY. KAZINFORM — Almatydaǵy birqatar sport obektilerinde bıyl jóndeý jumystary júrgiziledi. Olardyń qatarynda — «Almaty arena», «Halyq arena», Balýan Sholaq atyndaǵy sport jáne mádenıet saraıy bar.
Byltyr Sybaılas jemqorlyqqa qarsy is-qımyl agenttigi 5 óńirde sport nysandary memleket menshigine qaıtarylǵanyn habarlaǵan bolatyn. Olardyń qatarynda Almaty qalasynda buryn memlekettik-jekeshelik áriptestik aıasynda óteýsiz negizde jeke uıymnyń basqarýynda bolǵan «Halyq arena» jáne «Almaty arena» keshenderi boldy.
Osy oraıda, Kazinform agenttigi bul nysandardyń qazirgi jaı-kúıi men bolashaq josparlaryn anyqtaý úshin qala ákimdigine saýal joldady. Agenttik suraǵyna Almaty qalasynyń sporttyq ǵımarattary dırektsııasy jaýap berdi.
— «Almaty arena» jáne «Halyq arena» sport obektileri Almaty qalasynyń kommýnaldyq menshigindegi obektilerdi senimgerlik basqarý týraly № 4 kelisimshart negizinde 2024 jylǵy 9 shildeden bastap «Almaty qalasynyń sporttyq ǵımarattary dırektsııasy» JShS-ne senimgerlik basqarýǵa berildi. Kelisimshart Almaty qalasynyń Sport basqarmasymen jasalǵan, - delingen kompanııa jaýabynda.
Sondaı-aq resmı jaýapqa sáıkes, Balýan Sholaq atyndaǵy sport jáne mádenıet saraıy da 2024 jylǵy 2 jeltoqsannan bastap Almaty qalasynyń sporttyq ǵımarattary dırektsııasyna senimgerlik basqarýǵa berilgen. Bul kelisimshart Almaty qalasynyń Memlekettik aktıvter basqarmasymen jasalǵan.
Jalpy sporttyq ǵımarattary dırektsııasynyń málimetinshe, obektilerdi tıisti jaǵdaıda ustaý jáne is-sharalardy ótkizý sharttaryn jaqsartý maqsatynda ár nysanda jóndeý jumystaryn júrgizý josparlanǵan. Atap aıtqanda, bıyl «Almaty arenada» nysannyń ishki úı-jaıy men sýaǵar júıesi jańartylady. Al «Halyq arena» nysanynda shatyr jabynyn, gıdrooqshaýlaý júıesin jáne sýaǵar júıesin jóndeý josparlanyp otyr. Balýan Sholaq atyndaǵy sport jáne mádenıet saraıynda osy jyly órt dabyly júıesi, ınjenerlik jeliler jáne tońazytqysh jabdyqtary jańartylady.
Qaladaǵy dene shynyqtyrý-saýyqtyrý keshenderiniń kúıi qalaı
Almatyda buqaralyq sportty damytý úshin jyl saıyn qalanyń ár aýdanynda dene shynyqtyrý-saýyqtyrý keshenderi ashylyp keledi. Biz qalalyq Sport basqarmasyna saýal joldap, aldaǵy ýaqytta shahardyń qaı tusynda sporttyq nysandardyń boı kóteretinin suradyq.
Basqarma jaýabyna sáıkes, búgingi kúni qalada zamanaýı talaptarǵa saı, sporttyń kóptegen túrlerin damytýǵa múmkindik beretin 6 jańa dene shynyqtyrý-saýyqtyrý kesheni bar. 2022 jyly Jetisý aýdanynda 3 jańa keshen, 2024 jyly Alataý, Medeý, aýdandarynda bir-bir keshen paıdalanýǵa berilgen. Bıyl aqpan aıynyń ishinde Túrksib aýdanynda taǵy bir keshenniń ashylý josparlanyp otyr.
— Qazirgi ýaqytta Jetisý aýdanynyń Aqjar, Shuǵyla, Saıaly yqsham aýdandarynda jáne Avıator stadıonynda tórt jańa dene shynyqtyrý-saýyqtyrý kesheniniń qurylysyn bastaý úshin jobalyq-smetalyq qujattama ázirlenip jatyr. Sonymen qatar múmkindigi shekteýli jandar úshin arnaıy sporttyq ortalyq qurylysy josparlanǵan. Jobalaý jumystary 2025 jyly aıaqtalyp, qurylys bastalýy qajet, - delingen basqarma jaýabynda.
Sport basqarmasynyń málimetinshe, bul sport keshenderinde 9 982 bala jattyǵady.
Buǵan deıin Túrksib aýdanynda qurylysy uzaqqa sozylǵan dene shynyqtyrý-saýyqtyrý kesheni týraly jazǵanbyz.