Memleketke qaıtarylǵan 2 mlrd teńgege Atyraýda mektep salynatyn boldy

ASTANA. KAZINFORM — Zańsyz ıemdenilgen aktıvter esebinen qaıtarylǵan qarajatqa Atyraý oblysy Qyzylqoǵa aýdany Jamansor aýylynda 150 oryndyq mektep mektep salynady. Bul týraly Úkimettiń baspasóz qyzmeti málimdedi.

Memleket basshysynyń tapsyrmasy boıynsha «Zańsyz ıemdenilgen aktıvterdi memleketke qaıtarý týraly» Zań sheńberinde Arnaýly memlekettik qor qarajaty esebinen elimizdiń óńirlerinde áleýmettik mańyzy bar jobalardy iske asyrý boıynsha jumys jalǵasýda.

— Úkimet Atyraý oblysy Qyzylqoǵa aýdany Jamansor aýylynda 150 oryndyq mekteptiń qurylysyna 2 mlrd teńge bólý týraly sheshim qabyldady. Qazirgi tańda aýylda 60 orynǵa beıimdelgen ǵımaratta ornalasqan bastaýysh mektep qana jumys isteıdi. Ata-analary 4-synypty bitirgennen keıin oqýshylardy 60 shaqyrym qashyqtaǵy Maqat aýdany Dossor kentinde ornalasqan S. Sháripov atyndaǵy mektep-ınternatqa aparýǵa májbúr. Joǵary synyp oqýshylary kórshiles eldi mekenderge qatynap oqıdy. Jobany iske asyrý qorytyndysy boıynsha talaptarǵa jáne sanıtarlyq normalarǵa sáıkes balalardy sapaly oqytý úshin jaǵdaı jasalatyn bolady, — delingen habarlamada.

Buǵan deıin Úkimet Aqmola oblysynyń Zerendi aýylynda sport keshenin, Túrkistan oblysynyń Temirlan aýylynda mýzyka mektebin, Arqalyq qalasynda daryndy sportshy balalarǵa arnalǵan sport keshenin, Astanada tirek-qımyl apparaty buzylǵan balalarǵa arnalǵan ońaltý ortalyǵyn, Almatyda erekshe qajettilikteri bar adamdarǵa arnalǵan jattyǵý ortalyǵyn, Aqtóbe qalasynda erekshe balalarǵa arnalǵan arnaıy balabaqsha salý, Rıdder qalasyndaǵy kópsalaly aýrýhana kesheniniń qurylysyn aıaqtaý sekildi jobalardy iske asyrý úshin qarajat bólý týraly sheshim qabyldaǵan bolatyn. Atalǵan jumys jalǵasýda.

Aıta keteıik, «Jaıly mektep» ulttyq jobasy aıasynda Shymkentte 18 mektep salynatyny habarlandy.