Memleketke qaýip tóndiretin indet
ASTANA. QazAqparat - Sybaılas jemqorlyqqa qarsy kúres bıliktiń memlekettik ınstıtýttarynyń turaqty serigi bolyp tabylady. Búkil álem osy zulymdyqpen kúresýde. Osy rette, memleket óziniń zańdary men memlekettik qurylymdaryn ózgertip, jańa tehnologııa joldaryn engizýde. Alaıda, sybaılas jemqorlyq onymen «óship» jatqan joq, qaıta órship, jańasha baǵytta beıimdelip jatyr. Sondyqtan da, memlekettiń sybaılas jemqorlyqqa qarsy kúresi toqtaýsyz, ıaǵnı, sheksiz.
Bul jerde memlekettiń kúshi qoǵamnyń qoldaýynsyz jeńiske jete almaıdy. Ásirese, mundaı alyptarmen kúresýde azamattyq qoǵam sheshýshi ról atqarady. Elbasymyz N.Á.Nazarbaev aıtqandaı: «Sybaılas jemqorlyqqa memleket pen qoǵam birige otyryp, qarsy kúresý kerek. Sybaılas jemqorlyq -jaı ǵana quqyq buzýshylyq emes. Ol memlekettiń senimdi tutastyǵyn ajyratyp, ulttyq qaýipsizdigine qaýip tóndiredi».
Biz ádiletsizdikti kórgende memleketti kinálap, óz renishimizdi bildiremiz, alaıda, sybaılas jemqorlyqpen kúresýge kelgende eshqaısymyz atsalyspaımyz.
Bizdiń kóptegen azamattarymyz kúndelikti turmystaǵy sybaılas jemqorlyqty zańdastyrmaıdy, keıde olar muny solaı bolý kerek dep te oılaıdy. Mundaı jaǵdaıda memleket te, eshqandaı quqyq qorǵaý organdary da eshnárse isteı almaıdy. Bárin jazalap, otyrǵyzý múmkin emes. Sondyqtan da, sybaılas jemqorlyqpen tıimdi kúresý úshin, árbir azamat atsalysyp, ózindik úlesin qosýy kerek, ıaǵnı, azamattardyń sybaılas jemqorlyqqa degen kózqarasyn ózgertpeıinshe, nátıjege jetý múmkin emes. Sybaılas jemqolyqpen kúresý - qoǵamnyń jáne ár azamattyń isi ekenin ár qazaqstandyq ár otbasy túsinýi kerek.
Uly Abaı atamyz aıtqandaı: «Urpaǵyńyzǵa asyl mura retinde arsyzdyqty ákeletin baılyqty emes, tárbıe, bilim, ımandylyqty qaldyr».
Sybaılas jemqorlyq - adam tabıǵatynyń buzylýyna, adamgershiliktiń taptalýyna, adamdardyń bólinýine ákeledi. Bul qoǵamdyq sananyń rýhanı jaqtan emes, materıaldyq turǵydan daǵdarysqa ushyraýy. Sybaılas jemqorlyqqa nemquraılyq - qoǵamnyń eń ózekti máselesi. K.Marks jazǵandaı: «Áleýmettik júıeniń qaq ortasy irip-shirise, onda halyqtyń sany emes, qylmystyń sany órshı túsedi». Adam belgili bir materıaldyq jaǵdaıǵa táýeldi bolǵanda, ol ar-uıat, namysty ekinshi orynǵa qoıady. Eger, biz osylaısha, ar-uıat, namysty ekinshi orynǵa qoıatyn bolsaq, onda bolashaqta tutas bir urpaqty joǵaltyp alýymyz múmkin. Biz osyny túsinýimiz kerek, sebebi, sybaılas jemqorlyqqa qarsy kúrese otyryp, ómirimizdi odan ári jaqsartyp, adamgershilik, rýhanı baılyǵymyzdy joǵaltpaı, órkenıetti el qurýymyz kerek. Bizdiń Elbasymyzdyń «Bolashaqqa baǵdar: rýhanı jańǵyrý» atty maqalasy osyǵan shaqyrady.
Táýelsizdigimizdiń alǵashqy kúnderinen bastap sybaılas jemqorlyqqa qarsy kúres elimizdiń basty saıasaty bolyp qalyptasty. TMD elderiniń arasynda alǵash ret «Sybaılas jemqorlyqqa qarsy» kúres týraly zańyn qabyldap, sybaılas jemqorlyqqa qarsy arnaıy organ quryldy. Memlekettik apparattyń jumysynyń tıimdiligimen sybaılas jemqorlyqqa qarsy kórinisteri artty. Halyqqa qyzmet kórsetý ortalyqtarynyń ashylýy men avtomattandyrylýy azamattar men sheneýnikterdiń arasynda kúndelikti baılanystar azaıyp, sybaılas jemqorlyq kórinisterdiń tómendegenin baıqaımyz.
Búgingi tańda memlekettik qyzmetter kórsetýdiń 723 túrin elektrondy qyzmetter kórsetý arqyly alýǵa bolady. Jyl ótken saıyn azamattar memlekettik qyzmetter kórsetý boıynsha tikeleı memlekettik organdarǵa ótinish berý sany azaıyp keledi. Jyldan-jylǵa memlekettik qyzmetter kórsetýde halyqqa qyzmet kórsetýdiń ortalyqtary men elektrondy qyzmetter kórsetýdiń úlesteri artyp keledi. Mysaly, ústimizdegi jyldyń 4 aıynda elektrondy qyzmetter kórsetýdiń úlesi 48 paıyzdy qurady. Bıznes salasynda ákimshilik kedergileri kúrt tómendedi. Ruqsat berý qujattary 80 paıyzǵa qysqaryp, jospar boıynsha tekserý jumystary azaıdy.
«Biz memlekettik organdardyń sheshimin atqarý, ony talqylaý jáne qabyldaý isine halyqtyń qatysýyna úlken joldar ashyp otyrmyz. Memlekettik organdardyń janynan qoǵamdyq keńester qurylýda. Oǵan negizinen úkimettik emes uıymdardyń músheleri tartylǵan. Azamattyq baqylaý jemqorlyqqa, ysyrapshylyq pen aram pıǵyldy sheneýnikterge berik tusaý salady. Biz bul joldan taımaımyz, biraq, bul múmkindikter Qazaqstannyń azamattyq qoǵamyna úlken synaq bolmaq, olardyń qoǵamdyq keńesterdegi jumysy kemel ustanym, halyq aldyndaǵy jaýapkershilik prıntsıpteri negizinde júrýi tıis», - dedi Elbasy.
