Memleketke halyq kómektesýi jáne osyny durys túsinýi kerek – Dáýren Qýat
NUR-SULTAN. QazAqparat – Jazýshy, Halyqaralyq «Alash» syılyǵynyń laýreaty Dáýren Qýat Memleket basshysy Qasym-Jomart Toqaevtyń málimdemesine oraı pikir bildirdi, dep habarlaıdy QazAqparat tilshisi.
«Memleket basshysynyń málimdemesi – naǵyz kerek málimdeme boldy. Tótenshe jaǵdaı jarııalanǵaly kómek, járdem suraıtyn adamdar sany kóbeıip ketti. Medıtsına qyzmetkerleriniń densaýlyǵyna, jeke bastarynyń qaýipsizdigine qatysty máseleler týyndady. Kásipkerler kásibinen qaǵylyp qalmaýy kerek, sondaı-aq alyp otyrǵan jalaqylary tómendep qalǵan nemese kúnkóris kózinen aıyrylyp qalǵan azamattar bar. Memleket basshysy Qasym-Jomart Toqaev keshe osy máselelerdiń bárine toqtalyp, qajetti kómek kórsetiletini týraly málimdedi», - deıdi jazýshy Dáýren Qýat.
Ol Memleket basshysy bıliktiń halyqpen birge ekendigin, halyqty eshqandaı qıyn jaǵdaıǵa qaldyrmaıtyny týraly aıtqanyna toqtalyp ótti.
«Bul – bizdiń memleketimizdiń áleýetin, mol qarajatymyz bar ekenin, osyndaı qıyn jaǵdaıda memleket tarapynan kómek bolatynyn kórsetedi. Prezıdenttiń «Endi memleketke halyq kómektesýi kerek» degen sózi kóńilimnen shyǵady. Bul sózdi durys túsinýimiz kerek. Olardyń qoıyp otyrǵan talaby – vırýstyń taralyp ketpeýi úshin úıden shyqpaı otyrý. Bul adamnyń quqyǵyn, jeke basynyń múddesin shekteıtin talap emes. Bul jeke basymyzdyń qaýipsizdigin saqtaý úshin jasalǵan talap», - deıdi Dáýren Qýat.
Sondaı-aq, ol beriletin áleýmettik tólemderge toqtalyp ótti. Onyń sózinshe, Prezıdent 42 500 teńge beriletini týraly jaı ǵana aıta salmaı, ondaı kómektiń qansha adamdy qamtıtynyna nazar aýdardy. Sonymen qatar, Dáýren Qýattyń paıymynsha, bul Úkimettiń osyǵan qatysty sanaq, saraptama júrgizgenin bildiredi. «Keshegi Prezıdenttiń málimdemesinen keıin kóńilimiz ornyǵyp qaldy. Aınalańdaǵy adamdardyń alańdamaı, bolashaqqa senip otyrǵany da jaqsy ǵoı», - deıdi ol.
«Qansha qarjy bólindi, ony qansha adam aldy – Úkimet osynyń bárin ashyq túrde kórsetip otyrsa jaqsy bolar edi. Mysaly, Aqmola oblysyna qansha janar-jaǵarmaı bólingeni ashyq kórsetilse. Sonymen qatar, telearnalar azyq-túliktiń adamdarǵa tegin jetkizilgeni týraly vıdeosıýjetter kórsetip tursa durys bolar edi», - deıdi Dáýren Qýat.
Aıta keteıik, keshe Prezıdent Qasym-Jomart Toqaev respýblıkalyq telearnalar efırinen málimdeme jasaǵan bolatyn.
Foto: bilimdinews.kz
