Memleketke 7,3 mln zalal keltirgen: soltústik Qazaqstanda zańsyz ken óndirgender ustaldy

PETROPAVL. KAZINFORM — Soltústik Qazaqstan oblsynyń Shal aqyn aýdany aýmaǵyndaǵy «Dvoınıkı» ken ornynda belgisiz tulǵalar jer qoınaýyn paıdalaný salasyndaǵy zańnamany buza otyryp, eshqandaı ruqsat qujattarynsyz tabıǵı shaǵal tasty óz betinshe óndirgeni anyqtaldy. Bul týraly Bas prokýratýra málim etti.

Qadaǵalaý qyzmeti sheńberinde jáne beı-jaı qaramaıtyn azamattardyń kómegimen, Soltústik Qazaqstan oblysynyń mamandandyrylǵan tabıǵat qorǵaý prokýratýrasymen keń taralǵan paıdaly qazbalardy óz betinshe óndirý faktisi anyqtaldy.

— Jasalǵan quqyqbuzýshylyqtyń tolyqtyǵyn, jan-jaqtylyǵyn jáne durys quqyqtyq saralanýyn qamtamasyz etý maqsatynda sertıfıkattalǵan marksheıder mamandy tarta otyryp, tekserý uıymdastyryldy. Nátıjesinde óz betinshe óndirilgen paıdaly qazbalardyń kólemi 3,9 myń m³ qurap, memleketke keltirilgen zalal mólsheri 7,3 mln teńgeni qurady, bul iri zalaldyń keltirilgenin dáleldeıdi, — delingen habarlamada.

Atalǵan fakti boıynsha mamandandyrylǵan tabıǵat qorǵaý prokýratýrasymen QK 334-babynyń 2-bóligi boıynsha sotqa deıingi tergep-tekserý tirkelip, Soltústik Qazaqstan oblysynyń polıtsııa departamentine tergeý úshin joldandy.

Sonymen qatar, Afanasevka aýylynda, atalǵan ken ornyna jaqyn jerde, syrtqy sıpattamalary «Dvoınıkı» ken ornynan óndirilgen paıdaly qazba túrine sáıkes keletin tabıǵı shaǵal tas qory anyqtaldy. Onyń shamamen kólemi 5,5 myń m³, zalal somasy 10,7 mln teńgeni quraıdy.

Qazirgi ýaqytta tirkelgen qylmystyq is aıasynda atalǵan quqyqbuzýshylyqty jasaǵan tulǵalardy anyqtaýǵa baǵyttalǵan barlyq qajetti protsestik áreketter júrgizilip jatyr. 

Sotqa deıingi tergep-tekserý barysy baqylaýǵa alyndy.

Búgin sondaı aq, Bas prokýratýra Qazaqstanda qylmystyq quqyq buzýshylyq 6,5%-ǵa azaıǵanyn málim etti.