Memleketke 7 mlrd. teńgeden astam somaǵa zalal keltirgen Atyraý oblysy ákiminiń burynǵy 1-orynbasary men basqarma bastyǵy qamaýǵa alyndy
ASTANA. 13 qyrkúıek. QazAqparat - Kommýnaldyq menshik obektilerin jekeshelendirý jáne olardy tómendetilgen baǵamen satý kezinde
Atyraý oblysy ákimshiligi laýazymdy tulǵalarynnyń ókilettikterin teris paıdalaný faktisi boıynsha jáne Qyzylqoǵa aýdanynda gazqubyry men «Atyraý-Dossor» toptyq sýqubyryn salýǵa bólingen jalpy sommasy 6,3 mlrd.teńgeden astam bıýdjet qarajatyn urlaý faktileri boıynsha qozǵalǵan qylmystyq ister tergelýde. Bul týraly QR Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmetinen málim etti.
Sonymen birge 7 qyrkúıekte Agenttiktiń tergeý-jedel tobymen Atyraý qalasyndaǵy mektep jáne aýrýhana qyzmetkerlerine arnalǵan nesıelik turǵyn úılerdi salýǵa bólingen 177,5 mln.teńgeni talan-tarajǵa salý faktisi boıynsha, esepten shyǵarylǵan «Gýrev-Maqat» sýqubyrynyń qubyrlaryn, «Atyraý Aqparat» MKK-niń ákimshilik ǵımaraty men oǵan qarasty aýmaqty, «OblTransGaz» MKK-niń gazqubyrlary men ózge de múlkin zańsyz jekeshelendirý arqyly memleketke 7 mlrd.teńgeden astam zalal keltirýmen qyzmettik ókilettigin teris paıdalaný faktileri boıynsha qylmystyq ister qozǵaldy.
7 qyrkúıekte sot sanktsııasymen Atyraý oblysynyń energetıka jáne kommýnaldyq sharýashylyq basqarmasynyń bastyǵy B.Jaısanov úı qamaýyna alyndy.
12 qyrkúıekte atalǵan qylmystardy jasaýǵa qatysy bar degen kúdikpen Atyraý oblysy ákiminiń burynǵy birinshi orynbasary B.Dáýkenov pen oblystyq qarjy basqarmasynyń bastyǵy B.Jantemirov ustaldy.
Oǵan qosa, 13 qyrkúıekte Atyraý qalasynda qatty qaldyqtardy kómýge arnalǵan polıgondy salýǵa bólingen 111,8 mln.teńge bıýdjet qarajatyn urlaý faktisi boıynsha qylmystyq is qozǵaldy.
Qylmystyq ister tergelýde, ózge aqparat tergeý múddesine baılanysty jarııalanbaıdy.
