Memleketke 64 mln teńge shyǵyn keltirgen sheneýnik jeńil jazamen qutyldy

NUR-SULTAN. QazAqparat – Elimizdiń óńirlerinde medıtsınalyq apparattardy memlekettik satyp alý barysynda jemqorlyq áreketterdi anyqtaýǵa baǵyttalǵan is-sharalar júrgizilip jatyr. Bul týraly QR Sybaılas jemqorlyqqa qarsy is-qımyl agenttiginen málim etti, dep habarlaıdy QazAqparat tilshisi.

Vedomstvo málimetinshe, elimizdiń óńirlerinde medıtsınalyq apparattardy, onyń ishinde ókpeni jasandy jeldetý apparattaryn memlekettik satyp alý barysynda jemqorlyq áreketterdi anyqtaýǵa baǵyttalǵan is-sharalar kesheni júzege asyrylyp jatyr. Atalǵan is-sharalar barysynda Almaty, Shymkent qalalarynda, Aqmola, Almaty, Jambyl, Batys Qazaqstan, Qyzylorda, Qostanaı, Mańǵystaý oblystarynda sotqa deıingi tergeý tirkelip otyr.

«Máselen, Qyzylorda oblysynda oblystyq densaýlyq basqarmasy basshysynyń orynbasary Borambaeva aıyppul (300 AEK mólsherinde aıyppul) tóleýge sottaldy», - dep atap ótedi agenttikten.

Taratylǵan aqparatqa sáıkes, ol ókpeni jasandy jeldetý apparattaryn satyp alý barysynda laýazymdyq ókilettigin asyra paıdalanyp, tehnıkalyq sıpattamasyna jáne tenderlik qujattamaǵa saı kelmeıtin medıtsınalyq jabdyqtardy satypalǵan. Sol áreketi arqyly memleketke 64,4 mln teńge shyǵyn keltirgen.

Sondaı-aq vedomstvo sotqa deıingi óndiris aıasynda Almaty qalasynda, Aqmola, Almaty, Jambyl, Batys Qazaqstan, Mańǵystaý oblystarynda jalpy somasy 1,6 mlrd teńgeden asyp jyǵylatyn 270 ókpeni jasandy jeldetý apparatyn satyp alýǵa qatysty tekserý júrgizip jatqandyǵyn atap ótedi.