Memleketke 590 mln teńge salyq tólenbegen: Atyraýda qylmys jasaǵan adamdar ustaldy

ASTANA. KAZINFORM – Atyraý qalasynyń soty jalǵan shot-faktýralar men qylmystyq jolmen alynǵan kiristerdi zańdastyrýǵa baılanysty ekonomıkalyq qylmystardy jasaǵan adamdar tobyna qatysty úkim shyǵardy.

Tergeýdi QMA Atyraý oblysy boıynsha departamenti júrgizdi. Tergeý nátıjesinde A.S.Tıýıakpaevtyń basshylyǵymen, sondaı-aq S.A.Argalash pen A.S.Býlatovtyń qatysýymen tulǵalar toby uıymdasyp, 8 mlrd teńgege jalǵan shot-faktýralar rásimdeý arqyly qolma-qol aqshaǵa aınaldyrý jáne salyq tóleýden jaltarý shemasyn qurǵany anyqtaldy.

Osynyń saldarynan memleketke 590 mln teńgeden astam salyq tólenbeı, iri kólemde zalal keltirilgen. Sonymen qatar Tıýıakpaev 342 mln teńge kólemindegi qylmystyq kiristi baqylaýyndaǵy kompanııalardyń esepshottary arqyly óziniń jubaıynyń jeke shotyna aýdarý arqyly zańdastyrǵan.

Sot sanktsııasymen 4 avtokólikke 2 páter men bir turǵyn úıge tyıym salyndy. Tergeý barysynda 236 mln teńge óz erkimen óteldi.

Sot úkimimen Tıýıakpaev, Argalash jáne Býlatov kináli dep tanylyp, olarǵa 2 jyl 4 aıdan 4 jylǵa deıin bas bostandyǵynan aıyrý jazasy taǵaıyndaldy. Sondaı-aq, qylmystyq jolmen alynǵan kiriske satyp alynǵan múlik — Atyraý qalasyndaǵy páter men avtokólik — memleket paıdasyna tárkilendi.

Qarjylyq monıtorıng agenttigi málimetinshe, qalǵan múlikke qatysty azamattyq talap sheshilgenge deıin qamtamasyz etý sharalaryn saqtaý týraly sot sheshimi qabyldandy.

Úkim zańdy kúshine engen joq.

Aıta keteıik, Petropavlda salyq organy kóz jumǵan qyzmetkeriniń jesirine 34 mln teńge tóleıdi.

Jańa Salyq kodeksi kásipkerlik qyzmetti jeńildetedi.